• ×

01:13 صباحًا , السبت 31 أكتوبر 2020

قائمة


قصيدة بدا العارف اللي بالكلام بصير للشاعر مرشد البذال mp3


إرسال لصديق
تحميل الملف من هنا


استماع وتحميل قصيدة بدا العارف اللي بالكلام بصير للشاعر مرشد البذال الرشيدي mp3
من ديوان شعر قصائد الشاعر مرشد البذال الرشيدي

كلمات قصيدة بدا العارف اللي بالكلام بصير مكتوبة

بدا العارف اللي بالكلام بصير
مبداه في درب الهدى يشير
ترى كل كلمة من لساني هديه
يأتي لها في وضعها تفسير
اوصيك ياللي تسمع العلم منّي
واحفظ وصاتي لاتصير بعير
انا شفت من بعض المعاني دلائل
والاّ ترى روح الكلام غزير
الارشاد للعقال ترضى عواقبه
دليلٍ عن التيهات بالمسير
الله إذا حبّـك على الخير دبّرك
خلاك في كل الامور بصير
انا أغبط رجلٍ عن الناس مجتنب
إمّا سكت وإلاّ أعترض في خير
يرقد مريح البال ما حدٍ يلومه
يصير مع كل العباد عشير
ولا أغبط رجلٍ على الناس مشرف
يجي لهم بأحوالهم خشير
يكشف سرايرهم وهي رأس ماله
يركض الغرّات العباد مغير
ماسمع ربه وش ذكر بالـ آيه
راعي النميمه كيف له من مصير
مكروه فعله قبـّح الله فعله
ياكل لحم حيٍّ وهو يسير
الرابح اللي ماتعرّض غافل
ولا صار لابليس اللعين خبير
ليا شفت مبلي قل عسى الله ينقذه
من الظلم والاّ من بلاوي غير
لا تشمّت المبلي وتكفل نفسك
ترى كبيرات البلاوي طير
ترى الرب واحد والبلاوي مدبّره
والفرق بالتقديم والتأخير
تلوم لك مبلي وتكفل نفسك
أخاف دايرته عليك تدير
أهو كان في شده ويرجي رخاها
وانت برخى يامن شمت ضرير
ولاتفرح ان شفت الليالي تباشرك
بالمال والنسل الكثير وغير
قل ياجليل الملك هوّن ضدها
ترى الفرح عند الكدر جوير
جيران بأمر الله على مايريدهم
يمشون بأمر الباري القدير
كفاك ربك شر فرحة طاغي
فرحة طغى لابد من تكدير
ان صرت راعي نعمةٍ استتمّها
وأشكر لمن مشّى لك التيسير
ولا تحسب الدنيا ربيعٍ دايم
الغيم شابك والسحاب مطير
نوبٍ تزخرف لك نواوير فيضه
ونوبٍ حفا ضلعٍ وشوكها هصير
ولالك سوى ماكتب لك في جبينك
والارزاق بالتوفيق والتدبير
ان شفت يسر عقب عسر فأشكر
وان شفت عسرٍ لا تبات سهير
ولولا الفلس ما صار للسير لذه
ولا صار لكبار النعم تقدير
النعمه الكبرى ثلاث معاني
ثلاثٍ عددهن كاملٍ لاغير
مسكنك دارٍ ممننٍ غير خايف
والعافيه - والشوف بالنظير
ترى الخوف هو ويا المرض علة البشر
وإلاّ العمى راعيه ذا حسير
واللي يعاكس في كلامي هذا
ليا اونس حديهن صار له تذكير
فلا بد مايجري من الوقت نكبه
ولا عن سهوم الحادث فرير
ولولا القشر ما صار فضلٍ للهدى
ولا صار بين اعمالهن تغيير
ولولا الردى ما صار للطيب سمعه
لاشك هذا ضد ذاك يصير
والناس مثل الماء غدير ومالح
هذا ملاح وذا زلال غدير
والاجواد قربتهم تبيّض وجوههم
تنفع ولا من قربهم تأثير
والاشرار تنفعهم مكافاة شرّهم
والاّ ترى قرب اللئيم خطير
جارٍ ترى فرقاه عيدٍ ثالث
وجارٍ على قربه تسوق بشير
من رابع الطيّب كسب من مراجله
ومن رابع الخايب تراه عثير
ترى الرجال طيور يفرق فعلهم
فعل العقاب على الغراب عسير
الرجل عقل ومرجله وديانه
بلا شك راعي هالثلاث طهير
والنذل كذب وكبر والحق ينكره
ولا ينغبط في فعله الفقير
ولا تحسب الجاهل صغيرٍ سنه
الجاهل اللي يجهل التقدير
إذا صرت مسئولٍ بقومٍ سواهم
إذا صرت من فوق الرجال نظير
لا تاخذك زود السفاهه والجهل
تقول ذا عامل .. وانا مدير
وإلاّ تقول ان الفقير الثاني
خادم وانا عند الملوك وزير
ترى اللي عطاك الزود يقدر يمنعه
عليك خلاّق العباد ثوير
جنّب حقوق الناس وأحفظ حقك
على حقك أضرب في سنان شطير
وإذا ادعيت الحق قابل خصمك
ولا تدّعي بالبطل والتزوير
ترى الحق لو صابك لو اانّك تنكره
مالك عن الحق المصيب مطير
وإذا حصل عندك من الرأي شبهه
ترى الحوادث والامور تصير
لا تاخذ إلاّ رأي من تثق به
ينفعك في رايه وله ضمير
والباطل اللي مايفيدك شوره
بالك تحطه يالغشيم شوير
يذبك بوسط البير مَن لا يظهرك
يعرف النزول ويجهل التظهير
وإليا نشد عن طيحتك؟ قال خله
من قال له يقع بوسط البير
لو الناس في عقلٍ وقلب واحد
ما صار ذا حنطه .. وذاك شعير
ترى الجهل للرجل ماهو بسيره
يجهل شباب وينتهي كبير
والجهل يحدث بالرجال وبالنسا
وين اللذي معصوم وهو صغير
إمّا النسا ما أمدح ولا أقدح فيهن
ما أشوف في حالاتهن تعبير
لا أمدح عذرا تخيّب ظنّي
ولا كاشفٍ عيب وهو ستير
والاّ ترى فيهن خنين وخايس
أحدٍ عسل وحدٍ صيانة قير
من دش في مشروعهن مانظمه
العدل فيهن .. والميال كثير
حنى بتالي وقت والوضع اختلف
وقتٍ به افكار الرجال تحير
نشوف وقتٍ كل ماله يغرنا
نوبٍ يبشرنا .. ونوبٍ نذير
نوبٍ عدوٍ واقفٍ في سيفه
ونوبٍ يرد السيف بالجفير
نسمع بوقتٍ في توالي الدنيا
الجار ما يئمن من القصير
الله يعمّر دارنا بأخيارنا
شعب الكويت وحضرة الامير
والله يخون اللي يخون المؤمن
ياعل بيت الخاينين دمير
البطل ما سفر على درب صاحبه
والحق نوّر للجميع سفير
حنا ليا شفنا خمالٍ ننكره
ونشكر فعول الصافي البرير
اللي تبين حموّته ومروّته
طيّب لبن ماله مقاصد غير
لولا الحميّه بالزمان الجافي
ما بان فرق الحصن والحمير
رجلٍ ترجى نفعته من طيبه
سيفٍ على رأس العدو شقير
ورجلٍ يوصف للحرامي بيته
عدوٍ من البدّه عساه غضير
ترى العدو يدخلك بأحسن سيره
يصوّر لك اللي تشتهي تصوير
واليا ملكّ ونال منك مطالبه
شفت الكدر لاشك وين تطير
رقد على قرش النعيم اللي لك
خلاك ترقد فوق سمط حصير
عسفك لين انه يزين عسافك
على دورة المنحاه والتصدير
ليتك تجذا باركٍ قدامه
ترغى ولا نشره على الهدير
قادك على مايشتهي وانت تتبعه
مثل البهيمه في رقبته سير
هذي نصيحه من فيهمٍ عارف
يحذر بها اللي يفهم التحذير
يقول اللي قال له نصيحه
ولا تجهل العقّال بالتفسير
تمّت بذكر اللي علينا فضله
عسا حالنا عند الكريم ستير

0 0 421 06-06-2018

أستمع للصوتيات الأكثر أستماع وتحميل

تعليقات وردود الزوار - أضف تعليقك

تعليقات وردود الزوار - أضف تعليقك ( 0 )

تعليقات وردود الزوار - أضف تعليقك ( 0 )


Privacy Policy