كل عام وانت بخير وايامك بخير=لايابعدهم كلهم ياغناتي


انت بحياتي شي ثاني عن الغير=تقدر تقول  : اجمل حدث في حياتي


انت الفرح انت الوفا والتباشير=انت امنيه لا والله كل امنياتي


دايم افكر لو خسرتك  وش يصير=وقول دايم جعل قبله وفاتي


من قبل اعرفك ماحسبت المخاسير=واليوم شفني ماخسرتك واحاتي


اذا افترقنا بطلبك مطلب صغير=لاتزورني بين النعاس ومباتي


اخاف لاجوني طيوفك مسايير=قلطهم قلبي تعشوا مماتي


ماقلت لك  طبع الوجيه المسافير=ماتغيب وان غابت ليالي وتاتي


يعني اذا بتغيب من غير تفكيير=ترجع قبل لا ينكسر لك ثباتي


ولا اخذني معك من وين ماتسير=مدامك الدرب الطويل بجهاتي


لو نفترض اني وصلت السما طير=احوم حومة حر والريح عاتي


المشكله اني بلياك ماطير=لانك جناحي للمطير ونجاتي


الطيحه منك تترك اسنين تأثير=من قال لك ماراح تشمت عداتي


لا والله الا طيحة الدلو في البير=ياكبرها منك الملم شتاتي


 وص انت قلبك يذكر الحب بالخير=ولا انا والله لقضب وصاتي


 امانتك .. في داخلك شوفني غير=وامانتي .. لقربك قرب ذاتي


 من كثر ماخانت غلاك التعابير=معاك احس اصدق كلامي سكاتي


 لكن تعال وخل عنك المعاذير=شفني شسوي وسو عقبي سواتي


ارفع يديك لمن يرد المقادير=وردد ورايه ماتقوله شفاتي


كل عام وانت بخير وايامك بخير=وانا معاك اعيش باقي حياتي