لحظه قبـل لا تطلـب البعـد وتغيـب=وتنهي معايـه مرحلـه مـن حياتـك 


أخـذ الهدايـا والصـور  والمكاتيـب=دامي خسرتـك مـا أبـي  ذكرياتـك 


يمكـن يكـون فراقنـا رأيٍ مصيـب=خيـره .. كتبهـا الله جتنـي وجاتـك 


مع اني ادري انت ماعنك تجنيب=كنك موصيني وقاضب وصاتك


رح واترك بقلبي لك أربـع  معازيـب=معزتـك طاريـك حـبـك  غـلاتـك 


وإن شفتني أجمع شتاتي .. ماهو عيب=باكـر مـع الأيـام تجمـع  شتاتـك 


وإن شفتني شايـل جـروحٍ معاطيـب=باكر يصيـر الجـرح أبـرز صفاتـك 


أكبر مصيبـه فـي زمـان العذاريـب=إنّـي أحبـك وأنـت حبـك  لـذاتـك 


الطيـب لـو إنـك تجازيـه بالطيـب=ماكان تالـي الوقـت هـذي سواتـك 


يا صاحبي لا صرت أغـلا الأصاحيـب=لا تزعـل بكيفـك وتطلـب  رضاتـك 


أنـا حبيبـك مبعـد الشـوح مانيـب=من ضيّع جهاتـه .. يـدور  جهاتـك 


إن كـان ماعديـت روس  المراقيـب=ماني كفو أصـلاً أنـام فـي  عباتـك 


شفني مقدر عنـد عكـف  الأشانيـب=مانيب مـن تومـي عليـه بعصاتـك 


رح للفراق إللـي تركنـا  مصاويـب=شمّت اعداتي قبـل تشمّـت  أعداتـك 


الله معك .. رح وين مـاودك  تغيـب=هذي حياتك .. وأنـت حـر  بحياتـك