دثريني يامنيرة زمليني يامنيرة =يامنيرة في فؤادي فرخ عبد طق زيره


من هنوف صوبها راع الهوى يشعب بعيره =سيدة سادات قوم سادة ابناء ساده


من بهاها يامنيرة ويش اوصف ويش اخلي =في جبين الطهر منها بدر سبتين متجلي


هالة دون المصلي اخلفت وجه المصلي=في محاجرها عقيد القوم يومي به جواده


الحجاج هلال ماهو في اهلتنا مقيد=من يشوفه قبل لايبدي هلال العيد عيد


لامتى والموت حدر رموشها السود يتصيد=لامتى ذبح البشر عند العيون السود عاده


دوب يانع وردها في روض لبتها تفتق=في سحر منطوقها صرف من الراح المعتق


وكن ظفايرها على الغره ليا قامت تنتق=خدم سود وقوف حول البنت البيه غاده


ياوجودي يالزباد الزبد يالبيض المقشر=يوم حازت من امامي عمد واحمر المؤشر


مانا الا اخو عقم بمولود مبشر=من سروري يوم اعانق طيفها فوق الوساده


كن اصابعها من العناب او بسر عراقي=او بلح شام مجفف او قناني خمر ساقي


وكن ترايبها صحاف الترك حمران الطواقي=في سنا نور رقبتها ذابت اكثر من قلادة


فتنة من شافها في جو سابع عرش عرَش=كاد ناعم ثوبها في جسمها الغض يتحرش


مرحبا يامرحبا يامرحبا بالطش والرش=بالحرير الحر والغرو الغرير الغر عاده


كل ماتكبر تزين وكل ماتقدم تجدد=كن نحرها من وراء بوابة الثوب يتهدد


حجم ناحل خصرها في ردفها لاجيت احدد=حجم نقطة نون داخل نون ماتقبل زيادة


بين خصر اشتراكي وردف راس مالي=ويل ويلي شيب عيني طر جيبي ويل حالي


كل غض في نحرها شايف نفسه معالي=والثنين بكل صراحة يستحقون الاشادة


كن عايم صدرها في وقفته قرم ينادي=في خضم المعركة هل من مبارز او معادي


من غروره يعتبر كل مانقوله فيه عادي=يامصابيح الرواهب من بياضه في سواده


من مزاج الزنجبيله في شفاه السلسبيله=اورد الساعي كليب حتفه نظم الجليله


جمرة في روح تمره ضيعت ابو دليله=قايدٍ حاذاه قايد ريم وانساه القياده


من ليونتها كأن ماله ولا عظم جسدها=ومن نعومتها تخاف خدودها من لمس يدها


ومن كثر مامشيها جذاب ماتمشي وحدها=ومن كثر ماجلدها صخيف تحب اللبس ساده


ويش يسوى المسك وأبو المسك مع ريحة عرقها=يوم ذبت شالها وأهتز في الملعب حلقها


ما كأن الله مثل ياقي مخاليقه خلقها=فتنةٍ كانت ركون القصر تعبدها عبادة