تلاوة كاهن أم نفث قاري=بصدري يوم اجر الصوت ساري


أدندن دن دندن دن دندن=مثل ما دندن الدندان جاري


على ربع كبطن الكف قفر=حلقه من الذواري موس ذاري


كأن الريح فيه وحوش غابٍ =تحاور في حشا صدري حواري 


كأن جبال سلمى دون سلمى =هنا و هناك أنياب الضواري


شعا شاعي شعا شايع شعاها =شعاعا ما يباريها مباري


شعاشيع قراشيع شعثها =إلا شعشع سبيب ما تماري


ألا يالله طلبتك ثم طلبتك =سحابٍ من حياض الخلد جاري


تزبّر ثم تعبّر لين غبّر =و حبر ماطره وسط الخباري


تجلهم ثم تدلهم ثم أكلهم =بامر باري برى باريه باري


يحوف الشمس لين الشمس تصغر =شوي شوي مثل عين البخاري


إلى أن يختفي في ثوب نوه =جذب طاريه أهل درم السماري


مزونه مزنة و مزنة و مزنة =جواري حاكم تتلو جواري


بروقه في فتوقه من تشوقه =يلاعبها بأطراف الشباري


شهب مشهاب ضو أو شهاب =شهب شباب أشهب برق عاري


رعوده كلما نقض جعوده =قنيب ذيابة وسط الغداري


صدى أصواتها في كل ضلع =تلاميذ تردد خلف قاري 


تحارش ثم تهارش ثم تكارش =خطارش غيمته من غير طاري


بطش الرش حش القاع حش=يبش ولا ينش و له مواري


دغاريق هماريق بريق =باباريق ترقرقها عصاري


لا قبل ثم وبل ثم سبل =و طبل تحسبه يصرف مصاري


ولا جل البرد وبله و هلل =مكلل ماه يا الماشي حذاري


محاذيف البرد كبر الجماجم =و أصغرها مثل روس الحباري


كأن القوس من قزح على أول =ظهور أول ظهيره شبه ناري


سنا شفق به رمق تدلى =سويعة مغرب من فوق صاري 


سحاب جعل ربي لا امر به =يعم به اليماني و النزاري 


و يسقي كل أهل شبه الجزيرة =تهامة و الحجاز و نجد داري


و ابو ظبي و واد العين منه =تغار لحسنه جزر الكناري


عساه فوق قبر الشيخ زايد =مية ليل وهو سكاب جاري


قبر زايد و من هو مثل زايد =و أفعاله تغنيها القماري 


ملك بالطيب كل قلوب شعبه =بحب و خير و اسلوب حضاري 


حمل شعبه على كتفه إلى أن =تباكوا له بأطراف الصحاري 


سقى الله ضحكتك يابو خليفة =فلا زلت أعذب الأحباب طاري