ناقتي يا ناقتي ما عليك من الهروج=صيحتين في قفى الذيب تقفاها العجاج


العدل يبقى عدل والدروب العوج عوج=والعمى من لا معه من فعل كفه سراج


يا مكثرة الحكي والفعايل عوج هوج=ما يحذف الناس من كان بيته من زجاج


يا حمد طيراً جناحه ورى صدري يروج=ويش اسوي كانه افلت من ضلوعي وراج


مولدي في ارض عبقر من العام محجوج=انشدوا عن مولدي ليلة الحج ألف حاج


المطالب يا حمد دونها ضرب الفجوج=دونها شربك قراح مثل شربك هماج


ما ثنوا عزم ابن عباس اصحاب البروج=لين زوجها من اعزب حدب سيفه زواج


والدهر معنى دخوله من الداخل خروج=والله لزبن دخيلاً ولا سنع خراج


يا حمد لا تأمن الجدب في خضر المروج=مزنة العذب الفرات امطرت ملح اجاج


ولولا قولة والنعم ما اعتلوا فوق السروج=امة قبلك خبر حيها في الأرض داج


لا تعجب من علوج توطتها علوج=والله ان الشر للشر احياناً علاج


في جنوب افريقيا البيض ياطون الزنوج=وفي شمال افريقيا البيض ما ترفع حجاج


بترفع عن رجالاً على الهينة تدوج=عالم رامت مرام الصقور وهي دجاج


 قيصر من فوق غوج وكسرى فوق غوج =والجماعه بينهم راكبين فوق صاج


وش نبي في هامةٍ همها ضحكة غنوج=أو قيامة قامةٍ ما تقوم عود عاج


أحمد الله يوم لي من خيال الموج موج=اركبه لهاج سيف البحر تحتي وماج


ما تصفحت الليالي تصفح كتالوج=لين مع كل حادثٍ ذي حدث عشنا مزاج


العقيلة ما تبي غير ابن حربان زوج=يوم حاجة الذيابة غدت عند النعاج


ساقي النشوى لها من خروج في ولوج=كم أنال الصحو منها شديد الإحتياج


يا حمد مسيار ربعي عليه فوج فوج=غايتي يوم الردي غايته نجمه وتاج