ماني   بسائل   مع   منهو     تخونيني    =    بس بسئلك من  متى  وأنتي  تخونيني


قبل أمس كله  معي  للصبح    سهرانه   =     والبارحة   أذكر   ابرقد      ماتخليني


واليوم أشوفك  معه  يدك  وسط    يده     =   وأمر   قدامك   ولا   كنك     تعرفيني


وشلون! أبفهم  تعالي  واشرحي    ليه    =    نسيتي   لا   مستحيل   إنك      نسيتيني


مامداك    تنسين    يمكنك      تناسيتي  =      وأنا  الذي  كل   ماضاقت     ذكرتيني


العام  جيتي  ودمعك   مغرقٍ     جيبك    =    قلتي: أخذني على  صدرك    وغطيني


ماكنت  أخذلك   اليا   منك     طلبتيني     =   وأنا  قبل  ما  أطلبك  وإنتي  خذلتيني


في عز ماحتجت لك في ضيقة    الدنيا   =     جيتك  أبي   فزعتك   لكن     طعنتيني


للحين أكذب كل  اللي  حصل    قدمي   =     ماني   بقادر   أصدق   لا    تلوميني


حتى الشعروالقصيد اللي على خبرك    =    أحس   عقبك   أبد    ماعاد    يعنيني


كتبت  فيك  الوفا  والصدق   والطيبة   =     قصايدٍ  للأسف   بتطيح   من     عيني


(من غدرالأيام جيتك  كارهن  نفسي)    =    أول   قصيدة   بعد   منتي     عرفتيني


(ومحتاجلك حيل والله يقطع   الحاجة)   =     آخر   قصيدة   بعد   منتي     تركتيني


عرفتي الفرق  بين  الشعر    والشاعر    =    بس ماعرفتي وش  اللي  مرثعٍ  فيني


إحساسي اللي ذبحني وراح    يذبحني   =     واللي يبي  يقلب  الدنيا  على    سنيني


الناس  تسمع  قصيدي  فيك    وتصفق   =     وأنا   أتذكر   يوم    إنك      تخونيني