في
الإثنين 25 سبتمبر 2017

07-12-2007 07:45 PM

في الحقيقه اني كنت متردد بطرح هالموضوع لمااسوف يجلبه لنا من مشاكل حنا في غنا عنها لكن مصيبتي اني ماعرف اسد حلقي مره سديته جيرنا حسبوني مسوي عملية للوز ((بلاعيم)) المهم اني بجيب العيد بهالمقالة وصراحه انا احب ادارة التحرير محبه اخويه وتجمعني معهم صداقه حميمه عشان كذا ماحبيت اني اتضرر بروحي قلت اجمعهم معي ونتحمل الضرر كلنا (( يقولون لي مره ان جا يوم ومالقيت اسامينا في قائمة التحرير في المجلة كأدارة تحرير بتلقانا في جريدة الرياضيه ضمن رابطة مشجعين المنتخب والسبه انت )) .المهم من كم يوم كنت عند دكتور الجلديه اشكيه من مسمار لحم في طرف رجلي ولا كان يوجعني المسمار بس كذا نذاله مني قلت بشيله وطمعت بالدكتور يوم شفت اني داخل عليه بالمره اسئله عن امر ثاني .وقلت له يا دكتور انا عندي تساقط شعر رهيب ليتك تشوف لي علاج قبل لاصير رفيع المليجي ويضيع الامل في اخر شي مشي حالي.

قالي هذا كله من التفكير حاول ماتفكر واقوم واسئله وانا مستغرب يعني كيف مافكر اموت يعني؟؟ قال لا بس ماله داعي تفكر بالدنيا الدنيا ماتسوى ان حنا ننشغل فيها والتساقط هذا كله نتيجة التفكير وقمت وقلت له انشهد يا دكتور وربي انك صادق الدنيا ماتسوى والدليل لايحة الاسعار حقتك اللي برا واللي طيحت نص الشعر الباقي من التفكير ..المهم الدكتور حب يفهمني ان جميع الامراض اللي تجينا نتيجة حالات نفسيه وعصبيه ولفت نظري الدكتوروعطاني امثله لبعض الفنانيين والمشاهير و المغنين وحالت الغرق التفكيري و الارهاق النفسي والاظطرابات اللي يعانون منها و عشان كذا تشوف معظم المغنين صلعان بس مركبين باروكه خشية ان جمهورهم يكشف هالامر وتخف شعبيتهم وتتدهو نفسيتهم ولهالسبب تشوفهم في حالة نفسيه مزعزعه في المسرح يغطونها بالمطامر فوق هالمسارح طبعا عقب مايثبت الباروكه ببتكس نوع فاردونت حق السجاد الامريكي المتين المهم انه يسعى في ايهامك بأن الشعر المسبسب ذا من انتاج راسه وفي الحقيقه هو من انتاج حصن وجواميس ولاية تكساس وطبعا ربعنا في الخليج مرتاحين من الباروكه هالغتره مخلية النفسيه تنافس الممثل الهندي ابماتشاب وتشوف هالمعنويات مرتفعه ولا تطيح الا في حفلات لندن وجنيف والقاهره اذا هفتهم نفسهم على لبس البدل الفرساتشي والكنكورد اكيد وقتها بيبان نهر الرايخ اللي في روسهم ويبدا التزحلق على الطاولات والترابزين.

المهم تشوف هالشعر متساقط من كثر تفكير والحاله النفسيه الشينه سواء لنا او لهم لنهم يدورون اغنيه تصلح لنا وحنا لنها ماصلحت وغثنا وجاب لنا العله وتساقط الشعر والقروش.

فاتشوف الفنانيين تجيهم حاله نفسيه مزفته والسبب التفكير المستمر في اظهار اغنيه تضرب في السوق وتسوي له هوليله ويبدا يرتفع في برامج التوب تن وكل اخر اسبوع مع بداية البرنامج تشوفه يقرض من هالاظافر ولا يرتاح لين يكون من ظمن التوب تن وطبعا التوب تن يعتمد على مبيعات محلات التسجيلات واللي يرسلها لهم مسئولين المحلات وهم راجو وبابو وديراندي وهانشير احيانا تسئل واحد من هالمسئولين الهنود البياعه وش احسن اغنيه او فنان يقول بابا عبدالمجيد وماما نوال واجد زين .وطبعا الفنان يعتمد بشكل كبير على مظهره في قبول الجمهور له فاتشوف هالتلميع والتشميع في خلقته عشان بس يظهر بمظهر حلو ويكفي وجهه انه ينجحه حتى لو يغني اغاني روك نجديه وبعضهم مساكين وجيهم الله يعيظهم الجنه في عقده من خلقهم لدرجة احد الفنانيين اللي امتعنا بهز اوساط الجمهور في احد الحفلات المهرجانيه قال يعني لازم اصير رامي عياش عشان اغني؟ (( لا ابد خذ راحتك اهم شي عندنا الاخلاق والصوت وان تكون معك وحده مزيونه في الفديو كليب تعطينا وجهها وانت عطنا ظهرك يجنن )) اذكرمن كم شهر واحد من الاخوان يقولي شفنا الليوم في سوق الراشد سفيرللأغنية الخليجيه والحاصل على قيلادة الهلتون من الدرجه الاولى وقيلادة الشيرتون من الدرجة الممتازه وقيلادة فندق جورج الخامس والسادس واولى متوسط وثاني ثانوي .وقيلادة يوسف الكبير وصالح الصغير .وقيلادة هلا فبراير وهلا ابريل وهلا يمه وهلا السنه كلها .والحاصل على شهادة التقدير مع مرتبت بيرينزالصحيه .والحاصل على شهادة تقديريه من (( جامعة مكيج وجهك )) في (( ولاية مشط شعرك الامريكيه )) المهم سفيرنا جا سوق الراشد والتمو حوله المراهقين والمراهقات يبغون تواقيع (( هذا اللي قاهرك )) وكن حنا في نهاية حفلة سمريه في احد الدول الغربيه افصخو الحيا جعلهم المرض المهم انهم نسو كل القيم والاخلاق والعادات وسوبرالهيئه ولا فكرو الا انهم يتشرفون بلتقاط صورة او توقيع يتباهون به بين اصحابهم ظنا منهم انه من يورونهم التوقيع بيسمعون منهم (( ويلي)) من القهر والقبطه مايدرون انه اول مايشوفون التوقيع حقه بيقولون لهم اللهم لك الحمد ظيعتو خمس دقايق وقوف عشان توقيع؟؟‍‍‍!!! .

المهم مابغي اطول بس تعالو قولو لي وش رايكم بكلمات هالا غاني وبصرونا يمكن انا فاهم غلط..وش تقصد ذيك يوم تقول انا مليت الحب العادي؟.وش تبي يعني؟؟ ولا الاخ اللي يقول حبيبي جيت ابوسك تذكرت الليوم جمعه ..اموت واعرف السبت الشين ذا وش بيسوي ولااغنية علمني عليك .(( نعنبو دارك حاب لك فديو؟ ومضيع الكتيب حقها؟ا ))ولا اغنية وش تبي منا يا متعبنا (( وين تبغا ترتاح جعل المرض يريح بدنك؟؟ وكلمات كثيره ساقطه وربي يستحي راجو وبابو يسمعونها عشان كذا لاجيت تشتري شريط احد منهم قالك الهندي هذا مو زين خلي يولي كنه يقول وفر الخمس طعش ريال يا دلخ واشتر لك ماعونين فول وماعون كبده اصرف لك ...وسؤال اخير لمحطات الفضائيه ليه ماتخلون كل الفديو كلبات((كلبات بالشده على حرف الباء ولو تخلونها من غير شده تمشي برضو )) من الساعه 1 لين الساعه 5 على الاقل حنا نايمين وقتها خدمتونا من سماع هالغث ومنها عطيناكم راينا في الاغنيه وحنا نايمين

تعليقات 0 | إهداء 2 | زيارات 14556


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


تقييم
1.57/10 (695 صوت)

Powered by Dimofinf cms Version 3.0.0
Copyright© Dimensions Of Information Inc.

مجلة قصيمي نت Magazine Qassimy