في
الإثنين 25 سبتمبر 2017

07-12-2007 07:46 PM

وش خذنا وش خذو واقصد الغرب وش تعلمنا منهم وش تعلمو منا (( ابد تعلمو منا العلم وتعلمنا منهم قلة الحيا)) وهذي حقيقه للعلم ان العرب هم من ادخل العلم الحديث على الغرب (( يافرحت راكان بن حثلين فيك )) لكن في فتره من الزمن طمطمت الغشاوة على العرب والامة الاسلامية وغاصو في ملاذاتهم تاركين الغرب يسطر بين عيونهم اروع ما توصل له العلم .

وهذي الفتره هي بين فتح القسطنطينيه . بين فترة واخراج المسلمين من الاندلس واللي تسمى الحين اسبانيا

المهم ماهوب ذا موضوعنا لنه لو بندخل في تفاصيل هزايمنا الساحه العربيه بتحول موقعها سوق جمعه متخصص بيع فنايل نص كم وربي قست الفوارق بينا وبينهم عجزت احصيها عشان كذا بحصي اللي عندي في البيت بس (( انشالله تبي توريهم الطاسه حقت جدتك ؟ اذا تبي اسرائيل تسرق اسرار تصنيعها ورهم يا الشين خل اسرائيل تسبقنا في هالمجال وتصير حرب الطاسات على غرار حرب النجوم ورهم خل اعداء بل كلنتون يتشمتون فيه ويقول شف حلفائك العرب ضد اسرائيل يكشفون اسرارهم للأعداء وخاصه ان رفيقنا بيل كلنتون حامي ظهر العرب والمسلمين ترك السياسه واشتغل لاعب كورة وصار له اسبوع رامي الكورة في ملعب حافظ الاسد وحافظ الاسد ناسي جزمه حقته يبي يرمي الكره ماهوب عارف ويقول مستحيل استعمل الجزمه من غير ربطه (( ماهوب مشكله ر بطه ولا بدون ربطه اهم شي لاتضيع الكورة))وبيل كلنتون يقوله خيو حافظ خذ راحتك زي مابدك الجولان مش حاتضيع وقال انا مستني عند حارس المرمى رئيس الوزراء باراك وخط الدفاع شارون وشمعون بيريز ووليم كوهين وياسر عرفات وطبعا دينيس روس هو الحكم ماحنا لاقين اطيب من ذمته بالتحكيم اما الجمهور طبعا من غيرنا صحيح ضاحكين علينا مدفعينا قيمة المقصورة ومجلسينا في الدرجه الثالثه لكن الخدمه تجنن المهم انا قست الفوارق بينا وبينهم وغير كذا انا عارف وش خذنا منهم لكن حبيت اشوف وش خذو منا (( ابد ماخذو غير تحفير الخشم في المناسبات الرياضيه على المدرجات )) تصدقون مره شفت امريكي جالس يصور في مطعم مظغوط ومندي المهم ان خويه جالس يصوره لم الافران الخاصه ابها ويقوم رفيقي مفتخر يقولي شفت الامريكان ماهوب مصدقين اللي جالسين يشوفونه قلت ليه قال لنه ماعندهم زيه عشان كذا جلسو يصورن ولا ليش يصورونه يالله قلي (( ابد عشان يورون العالم تخلفنا ويقولون للعالم وتلمونا بعد ليه نسميهم العالم الثالث ها شوفو اللهم لك الحمد والسكر .طبعا هم يقولون السكر لكن حنا نقول الشكر دايم نحب نظيف وبعدين رجعت له وقلت يا شيخ احمد ربك صنفوك في العالم الثالث انا لو منهم اصنفك باك ايسر متأخر تجيب كور )

المهم قست لقيت ان حنا نصدر لهم التمر والقمح والترنج بعشرين دولار للطن (( صادق ويردونه لك بسبعين دولار )) ونصدر لهم قطع غيار السيارات (( السيارات ؟؟!!! )) اسف اقصد النخيل (( ايواه عدلها)) ونصدر لهم السلاح (( السلاح؟؟!!! )) اسف اقصد البصل (( ايوه عدلها هذا تاريخ يا عيوني نبي نوثقه قبل لاالغرب يدخل معنا منافسه عليه وتنتشر الريحه بين صنعا والاردن ))ويقومون هم ويعيدون تلقيحه ويردونه لنا تمور وبصل كالفورنيا اطيب ما تنتجه الطبيعه المهم انه حنا نصدر فديت خششنا ونجي للأهم شي نصدره وهو البترول عاد هذي صناعه خليجيه 100% صحيح البايبات امريكيه والصواميل بريطانيه والسلالم سويده والحفارات بلغاريه والاستشارات اسرائيليه والبواخر كنديه وحق الانتاج يبانيه لكن تبقا عربيه (( وذمتك وش خليت من الخروف ان كانك متعشم بالصوف ابشرك خذته المانيا عشان تصنع لنافنايل هيغز ))

ودي استمر لكن اشوف ولدي جنبي يناظرني بعين منتقده كنه يقولي بالله يبا هذا هو جيلك .شاطر بس تقول اجدادي سوو وافعلو طيب انت وش سويت ؟ وانا بيني وبينكم سئلت نفسي هالسئوال لكن مامداني اجاوب .الا وولدي يناظرني بنظره غريبه متعاليه .كنه يقول ..اتفووو عليك يبه جيل جبان جيل ينافس النسوان في هز الارداف في دعايات كوكا كولا ومشاهدت برامج استعراض الجمل اتفووو عليك جيل ماعندك غاريه ولا نخوه .ولا حمية وقت اللي البريطانين يمدون الصرب بالسلاح وتقتيل اخوانا في البوسنه رايحين حنا نستورد منهم سيارات الروزريس الفاشله في صنعها وما حنا الا داعم لستمرارهم .

يناظرني وده يقول اتفووو عليك .جيل فساتين فرساتشي ونينا ريتشي وقت اللي فرنسا دعمت الصرب في كوسوفا بأرسال لهم اسلحة التعذيب والقنص الليلي . وقتل الابرياء والتستر على المقتصبين ..رايحين حنا نفتح لهم معارض في دول الخليج ندعم فيها اقتصادهم المنهار

وده يقووول اتفوو عليكم جيل .. وقت اللي الروس تقتل في .اخوانا في الشيشان .رايحين ندعمهم في تصويت البنك الدولي ..عشان ياخذون غرض .لبنا اقتصاد روسيا واللي بالحقيقه هو لأبادت المسلمين في الشيشان ..وربي وده يقول . انت عار علي استحي اقول انك ابوي .اشرف مافيك انك مكتوب لك في شهادة الميلاد انك مسلم ..وده يقولي اتفووو عليك ابو جبان كل همك ترس الثلاجه من السفواي وتاخذ مالذ وطاب لك من البضايع الامريكيه ولأوربيه . وترس بطنك ..بالكاد تذكر ربك لاخلصت من الاكل وقلت الحمد لله ..ولا لا مر عليك برنامج فيه المسلمين يقتلون وقتها بس تنسد نفسك من البيتزا هت .وتنفتح لكيك الجيزس بالفراوله .وده يقولي اتفووو عليك جيل جبان وقت اللي .ارتفع فيه مصدر رزقك وهو البترول جاتك امريكا تقولك ارفع الانتاج ولا انت عارف طريق راس مشعاب .. وده يقول اتفووو عليك جيل جبان تؤمن ان الحياة والموت بيد امريكا ناسي رب الكون وامريكا …وربي صرت اخاف اناظره .لا يسويها ويطهرني بتفاله ووقتها قبور العالم ماتشيلني من الخذلان....

تعليقات 0 | إهداء 1 | زيارات 19023


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


تقييم
4.24/10 (243 صوت)

Powered by Dimofinf cms Version 3.0.0
Copyright© Dimensions Of Information Inc.

مجلة قصيمي نت Magazine Qassimy