في
الأربعاء 20 سبتمبر 2017

07-12-2007 07:52 PM

كلنا طبعا نعرف عصب الحياة اللي هو المال وبمسمى اخر الفلوس وبمسمانا
حنا البدوان القروش ولا الدراهم المهم ان له مسميات كثيره والعملة وحده

وصراحه الموضوع هذا ماودي اطول في مقدمته لني ماني عارف من وين ابدا في اكله مثل اللي يقول اكلك منين يا بطه فعلا موضوع مشوق واللي خلاني
اكتب عنه اليوم كنت في احد البنوك في زيارة وديه لاساحب ولا مودع بس
لقافه كذا أتفرج وصراحه شفت مستويات متفاوته من المراجعين شفت من
قالت الدنيا لهم شبيك لبيك وشفت من قالت الدنيا لهم اتفوو عليك (( طيب
خذ نشف وجهك )) لكن يجمعهم بنك واحد وانا واحد من الناس لي قصة غراميه مع القروش حبيتها من اول نظره (( حب من طرف واحد )) بغيت القروش تبادلني نفس الشعور لكن القلب وما يحب(( ياعيني على اللي حب ولا طلش )) المهم اني شفت القروش متراكمه فوق بعضها وكنهم يقولون لي وللي ماسكين السرا وراي شمو ولا تذوقون مع انهم مفروض يحطون لافته زي شاحنات البانزين الرجاء الابتعاد عن القروش 100 متر خوف عليك يا روحي ماهوب اكثر وحتى لاتصاب بداء الثعلبه المهم عقب ماتفرجت هممت للخروج من البنك لكن شفت براد ماي قلت بوقف اشرب ويوم شربت لقيت فوق البراد صندوق مكتوب عليه صندوق الاقتراحات كتبت اقتراح وقلت فيه اقترح تعطوني مليون ولا اثنين وتفكون عماركم من مراجعتكم كل اشوي على اشويت قروش ماتستاهل جيتي ولا تعطوني مليون ريال اسوي لكم فيه فديو كليب للبنك (( اشتغل النصب)).
وميزت الفلوس انها ماتفرق بين كبير وصغير شين وزين طويل وقصير نحيف
ونحيف (( قصدك دب لاتستحي )) وبين الاسمر والابيض وبين الاصيل والدفه وكلن الله قسم له منها نصيب سبحانه .
وفيه ناس عندهم قناعه من الفلوس مايحبونها (( انا معك مايحبونه
يمووووتون فيها )) زاهدين الدنيا يسمون الفلوس وسخ دنيا (( والله ياني
اعرف لي ناس من كثر الوسخ اللي عندها لو تحطهم في حمام سباحه وتكب
عليهم سطل صابون تايد مانظفت )) ويحاولون يخففون من وطئ شح القروش بذكر الصحه والراحه النفسيه (( و الاقساط والديون ومراجعة كراج السيارات كل اشوي )) وانهم ينامون بدري عكس التاجر يتقلب في فراشه ماينام الا متأخر (( ويلكم على السهر )) ويقولون ان التاجر يوم القيامه اكثر الناس حساب ((يا ويلهم على حساب اوناسيس وبيل جيتس ))و انه اللي يجيهم راضين فيه ولا هم بطماعه ولا يبون زود لكن لا جا اخر الشهر شفتهم صافين على مكاين الصرف يبغون الراتب ويقولك انه اكثر اللي كانو صافين دور في اول يوم السنه الافيه الثالثه كانو زهاد زياده عن اللزوم طمعو انه يزيد في حسابهم كم صفر على مطلع السنه الافيه الثالثه لكن طلع نابهم على شونه مانابهم غير تليف في الغضاريف والركبة ومراجعت المستوصفات وزود مصاريف .
والفقارى لا جاتهم القروش قال للمراه يا مره خشي القروش الدنيا ماينقال عليها القرش الابيض لليوم الاسود (( قروش ليت بجلي )) وبعضهم من كرهم للقروش لا جا يزوج بنته قال للي جاي يخطبهاا حنا المهر مايهمنا نشتري رجال ولاولا القروش زايله وانا عمك ولا قال اللي جاي يخطب ابشر برجال يا عمي رد عليه عمه وقال المهر 150000 مية وخمسين الف (( انا اشهد انك مشتري رجال اصلا الفديه هذي قيمتها )) على طاري القروش اذكر رفيق لي من اللي مهتم في خلق الله ويسئل دايم هذا كم عنده وذا كم يربح حبيت اقهره مره قلت تصدق اني كل يوم اصلي في مسجد كله ناس تملك لها ملايين فيهم من يملك 300 مليون وفيهم من يملك 400 مليون المهم اني اصلي وصافين معنا كم مليار .وتشوفهم المغرب من كثرهم يتعدى 5 مليار ولا جا الفجر صارو نص مليار واشوي فكه (( طبعا الفكه ذي انا ورفيق لي كنا جاين نصلي في مسجدهم ذاك اليوم عشان لا سجدنا دعيت ربي من قريب وقلت يارب عطني زي ذا اللي جنبي ))المهم انه اجتمع على حب المال جميع المذاهب والاديان وتشوفها عند الغني غايه وعند الفقير وسيله واثنينهم يكسرون الخاطر واحد شايل هم كسبها والثاني شايل هم حفظها وكل واحد يناظر الثاني بريبه الفقير يفكر كيف يطلع القروش من الغني والغني يفكر كيف يفوت الفرصه عليى الفقير وشهوة المال تعدت حدود الناس ودخلت في دوامة السياسه الدوليه بجميع توجهاتها السياسيه بالاخير ترجع للقروش الهدف الرئيسي لسياسة كل دولة متناسيه الشعارات الرنانه اللي ترفعها بين يوم والثاني لحقوق الانسان والباذنجان وتخفيف المعاناه عن اطفال الشيشان ...

نرجع للمال( فديت خشته محلاه فيه اصحاب لي يمدحون زين المية الف والربع مليون قد شافوها يقولون انه من زينها غنو فيها قصيدة انساك دا كلام واللي عاد تجنننن لكن ماعمري شفتها المليون ريال (( يعني بتفهمني انك شفت المية الف والربع مليون طيب كمل )) يقولون فيها زين يجننن والبنك مايزوجها لمن هب ودب الا اللي نافخ كرشه ومكبر الوساده (( والله لو هي بتكبير الكرش ولوساده كان طلعنا انا ونبيل شعيل وفهد الحيان بكم مليار )) ويقولون ان القروش لها نظره في اللي يمتلكها ماتجي الا اللي يحافظ عليهاويكرمها تحت البلاط (( الله يهني الدود فازت بالقروش وراعيها)) .أنتهى...
……………………………

اخواني يعلم الله اني اكتب لكم الحين مازح يوم اللي فيه بين جدران كثير من البيوت من هم في حاجة هالابتسامه بعد غيبه طويلة بسباب المرض والجوع وقل الحيلة يعلم الله انه فيه الآن من يصرخ من شدة الآم بسبب نقص في الموارد او حاجة لعلاج وربي اعرف عوايل لاتمكل من المال سوا مايكفيها لنص الشهر وباقي الشهر تشد الصخر حول بطنها وربي اعرف من هم الاحين يخففون من الآم طفل محتاج لعملية في الخارج لندرتها في الداخل ولا عندهم حتى قيمة التذكره وربي اعرف عايلة تناظر عامود بيتهم (رب الاسره) ينهد ولا هم عارفين كيف يصلبون طوله من كثر ديونه اللي معرضته للسجن بين لحظه والثانيه ومحولة حياتهم لجحيم ووربي اعرف لي ايتام بنت ام 19 سنه هي اللي تصرف عليهم واكبر رجال عندهم عمره 11 سنه فاقدين امان الاب وحنان الام وعددهم فوق السبعه وربي وقسما برب العزه اعرف من هم امس باتو من غير عشا ( من رداك يا الشين ) وللأسف ماعرفت غير من ساعه والسبب انهم عايلة متعففه تستحي انها تساوم في كرامتها حتى لو الموت كان لهم طريق...
اخواني تكفون يا بعد هلي من كان انعم الله عليه وعنده من الخير مايستر نفسه ويستر جاره لايتأخر الرسول علية افض الصلاة ترك جارك امانه في رقبتك لايبات مهموم وانت تدري لا يبات جايع وانت شبعان لا يبات مديون وانت قادر تسد دينه الفلوس وانا خوك لا هي عندك ولا هي في جيبك تاركها في بنك اليهود تلعب فيها وموهمينك بأرقام تاركينها لك تحسبنك غني ابها وانت افقر مايكون الناس تحتاجك وانت في الحقيقه محتاج اكثرللغير تكفا يا من تشد حزام الرخا فك من جارك صخور الوغا والله انا اقول ذا الحكي وانا مقصر في حق جيراني ولو ان جيراني ماهوب بحاجتي لكن المفروض حتى لو بالسئوال الجار اولى ومن كان جاره بخير ونعمه يناظر احاول المسلمين حولة يقول الرسول عليه افضل الصلاة والسلام اتق النار ولو بشق تمره ..كما دعا عليه افضل الصلاة والسلام وقال اللهم عط منفقا خلفا و اعطي ممسكا تلفا..

تعليقات 0 | إهداء 0 | زيارات 3761


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


تقييم
2.93/10 (224 صوت)

Powered by Dimofinf cms Version 3.0.0
Copyright© Dimensions Of Information Inc.

مجلة قصيمي نت Magazine Qassimy