في
الأربعاء 20 سبتمبر 2017

07-12-2007 07:53 PM

لي رفيق يقول يا كثر ماتقول في مقالاتك كلمة المهم يا رفيع وقالي انه بيعدهم لي في هالعدد كم مره اقول كلمة ((المهم)) ووعدته اني بحطها بين قوسين عشان يعدها ......وانا عشان اخفف من هالكلمه قلت بقول قصه حصلت لي من سبع سنوات. ((المهم ))القصة هذي اللي بقولها احصلت لي في اسبانيا في منطقه اسمها فنخرولا في ملقا ..((وربي مستحي اقول الاسم بس وش اسوي هي اسمها كذا )) ... وتبعد المنطقة ذي عن ماربيا 40 كيلو بالسيارة .. (( المهم)) اول ما وصلنا رحنا على طول وسكنا في فندق خمس نجوم ((.بالله عيد خمس ايش؟؟؟))...(( المهم)) سكنا في الفندق وخذنا غرفه ، وجلسنا اناظر الديره من على بلكونة الغرفه ولا حنا مصدقين (( الله يرحم ايام النعيريه كنت اطل من بلكونة فندق الشرافي واشوف حوش الغنم تحتي واقول سبحان الله من كان يتوقع اني اشوف هالطبيعه الجميله في يوم من الايام ؟ !! )) !! ((المهم)) عقب ماطلينا من البلكونه ولا ذا الخير وذا البحر وذا الناس رايحه وجايه وكلها لابسه حشمه على البحر ((أنا أشهد حشمه والدليل لو عندهم هيئة كان ما بقي على البحر غير قواطي البيبسي)). وبحكم ان حنا شباب وجايين ننبسط اول مافكرنا به هو ان حنا نسهر في احد مراقصهم ونشوف هو زي ذا اللي نشوفه في الافلام ولا هي خساير اشتراكات وبس (( المهم)) تشخصنا فيذاك الليوم ولبسنا من هالبدل الطقم وعشان نسوي نوع من انواع التغير تبادلنا البناطلين والقمصان وصار كل واحد يشوف في الثاني وش اللون اللي يناسب بدلته ياخذها منه((ناقصنا عبده ربان وحسين محضاري)) (( المهم )) كشخنا وقمنا أجرنا سياره مرسيدس وعشان تكمل التشخيصه حطينا السجاده حقة الصلاة على الطبلون حقها .(( المهم )) رحنا نحوس ونلف ومغير نسئل ومغير يودونا شمال ويردونا جنوب .وفي الاخير طحنا في ذاك الديسكو ..ودخلنا ..وصراحه اني استحيت لني اول مره ادخل مثل هالاماكن واللي زاد الطين دسكو ان حنا دخلنا للدسكو وكانو كلهم لابسين مايوهات .ويضحكون علينا .ان حنا لابسين بدل .وصراحه استغربنا ليه يضحكون علينا .الحشمه عيب عندهم ولا وش القصه ؟؟!!(( المهم )) انهم قامو يناظرونا وهم مستغربين ويضحكون .ونقوم حنا ونناظرهم كن حنا نقولهم اللهم لك الحمد. طبعا اقول هالحكي وخدودي وقتها تعكس ليتات الدسكو من حمارها ..المهم ماخذنا اشوي الا كل اللي جالسين قامو يرقصون .وكلهم لابسين شربات ..ولا خذنا اشوي الا رغوة الصابون ينزل علينا من فوق ودمر ملابسنا وذيك الكشخه اللي كنت متعشم عقب السهره اروح اصور ابها ماهوب عشان الذكرى لا عشان لابغيت البسها ثاني مره اتذكر الاوان .اللي لبستها ولا انسى لاخلطتها مع ملابسي الثاني ...(( المهم ))يوم طاح علينا الصابون من فوق ودمرنا عرفنا سر الاستغراب والضحك علينا اللي اضحكوه الاسبان يوم دخلنا عليهم متشخصين بالبدل (( المهم )) ونقوم ثاني يوم ونروح نشتري شورتات وقلت بكره بنروح الديسكو وبنرجع تاريخ الاندلس وقرطبه وقرطاجه وكل الحارات اللي راحت علينا وبنشوف يا حنا يا هم .وعقب ماشرينا الشورتات وكشخنا رحنا للدسكو .ودخلنا عليهم ولا دخلنا .الا هم كلهم لابسين بدل وكاشخين .وحنا الوحيدين اللي كنا بشورتات .ويقومون يضحكون مره ثانيه حسبي الله عليهم لاكذا عاجبين ولا كذا عاجبين ..وفي الحقيقه اني احترت .واقوم واسئل الجرسون وكان من حسن حظي انه مغربي وقلت له وراهم امس مصوبنينها والليوم .مخلين الوضع سراميك ؟..قال مهرجان الرغوه يوم في الاسبوع ينزل على الحضور .وكان هالليوم ذا امس ..وحنا كنا نحسبه حلا كل يوم .حتى الشورت اللي كنت لابسه .مكتوب عليه((نو لوكت)) ..يعني لاتناظر.بالانجليزي ..والناس ماغير لوكت فيني وانا كنت ناوي اخربها (( المهم )) يوم شفنا ان حنا ماحنا بكفو قلت لهم وش رايكم نروح نبسط في الفندق على البسين .(( البسين هذا اسمه حمام السباحه عند الانجليز اما عندنا يا البدوان نسميه البركه )) ((المهم )) اصحابي قالو لا بنجلس قمت انا ورحت ونمت بدري وقمت الصبح بدري ونزلت على البسين ويوم دخلت حمام السباحه ولا كله مزاليط !! حتى من الشكه جالست اناظر بعمري انا نازل بشي ولا مزلط انا بعد .. المهم يوم دخلت ولا ذي بنت خليجيه معها خدامتها وجالسه توها بتسبح لكن شافتني هونت (( تستحي فديت خشتها))... وقمت عاد انا وقلت بجلس لين تسبح (( قليل حيا فديت خشتي))..وهي طبعا حاطه في بالها انها تنتظر لين القّط وجهي واروح وعقبه تسبح ... لكن انا بخبرتي سويت نفسي ماشوف ((.عاد انا اذا اشتهيت صرت طه حسين )) وبعدين قلت في نفسي وراها ماتسبح قدامي ولا انا رجال الوحيد هنا والباقي نيلي ورفيقاتها؟؟؟!! . اصلا ماغير هي وثنتين بس بنات ولا الباقي رجال . ((المهم))..((بالله اذا طوفت كلمة المهم ماحطيتها بين قوسين ذكروني عشان مانلخبط الرجال فالعد )) ركب في راسي اني اعسكر .((المهم ))البنت يوم حست اني مسمار في لوح قامت واقصرتها وخذت خدامتها ومشت .. واقوم انا واروح عند الرسيبشن وقلت لهم عطوني غرفه على حمام السباحه قالو في زياده بالسعر .. يوم حسبت الزياده على طريقتي التجاريه ولا يسوى قيمة طلي من الغنم ..قلت يفداها الطلي لو سعر الغرفه قعود ماتأخرت (( القعود للي مايعرفون وش يعني القعود هذا الحوار في سن المراهقه .يعني تو شنبه يخط لاهوب بعير ولاهوب بحوار.وعند هل الامارات يسمونه البوش طبعا هذا البشبوش حقه)) ((المهم)) قلت ماعندي مانع قمت الصبح بدري واقوم واروح اعسكر في حمام السباحه ماعندي غيره وبيني وبينكم اصلا خفت اطلع من الفندق لا أتفاجئ اني للحين في البطحا . واقوم واجيب الشورت حقي اللي مكتوب عليه ((نو لوكت)) والنظارة الشمسيه ((جلست ساعه اكاسر ابها راعي الدكان اللي جنب بيتنا ولا رضا ينزلي من سعرها الا لين قلت له مافي جيبي غير هالخمسه ريال تبي ولا نزلت البطحا )).واقوم وراتكز . . ولا خذت اربع ساعات الا وهي جايه ويفز قلبي وقلت هلا ومرحبا مليون تعداد مافي الصين والهند واليابان والاحساء من شجر وعيون ... ولا جت وشافتني الا وانصفق وجهها (( مالومها توها مفطره )) ((المهم)) جلست وهي جالسه قدامي ومغير انتناظر انا وهي بالعيون هي بنص عين وانا بعيوني كلها ومن زود الحرص رافع حجاني برفاعة بناطلين ومغير مبرق اقول متى بيهديها الله وبتنزل المسبح وهي طبعا حاطه في خاطرها أني ساعه وامل واروح (( ماتدري ان اللي قدامها كان سكورتي سابق في ارامكو يداوم 12ساعه على البوابه دوام طبيعي و6ساعات مجامله )) ..(( المهم )) عسكرت وقلت في بالي على العموم انا ماجيت من ديرتي الا بعسكر فيذا .. ((المهم)) جلست تقريبا لين قبل اشوي من المغرب ..وقامت وشالت اغراضها ومشت وعقبها رجعت ثاني مره كانت ناسيه شي .

((المهم)) ..نكمل القصه في العدد الجاي ..بس انترست الصفحه .وهم قايلين لي لك اربع مية كلمه ..واللي قاهرني اني خذت في المقالة ساعه كتابه وعد كلمات المقالة اسبوع (( كني اشوف كم واحد بيحسب وراي الحين )).........مقطع من العدد الجاي ...((.جات وانا كنت نايم .ولا قمت الصبح الا وهي تسبح بوسط الحوض )) مع تحيات رفيع الشان ..والمخرج محمد نزيه شحادة .....مقاطع من شي ماشفتوه .(( طاح القلم مني وجبته))..

تعليقات 0 | إهداء 0 | زيارات 4450


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


تقييم
2.03/10 (238 صوت)

Powered by Dimofinf cms Version 3.0.0
Copyright© Dimensions Of Information Inc.

مجلة قصيمي نت Magazine Qassimy