في
الإثنين 25 سبتمبر 2017

07-12-2007 07:54 PM

اثرت الاستمرار والكتابه ايضا في هذا العدد لأعطاء فرصه اكبر للأخوان المشتركين في نسج اجمل مايجول بها اقلامهم في في هذي الزاويه و المجلة الرائعه والمواضيع الجميله وقرائها الأ اجمل (( اقول عن النصب وخش في الموضوع الراتب هو هو وربي ماهوب زايدينه لك لو يتوسط لك بوش بحجة ارهاب المجلة للشعراء والكتاب )))



انقضا الشهر الكريم الله يعوده علينا وخرجنا بأنطباع جميل يأكد ان السنه القادمه بيدخلون المنتجين الهنود في منافسه مع شركات الانتاج الخاصه بالمسلسلات الرمضانيه بعد ما شافو الهنود علامات المنافسه الجباره في استخراج الدمعه من عيونا وبعد ما استهلكت اشارات المرور والبزران كراتتين المناديل لين صار كرتون المناديل اغلى من دجاج ساديه 800 غرام وسبحان الله يقولون ان رمضان هو الشهر الوحيد اللي يستهلك فيه المناديل (( لا وربي حتى تاريخ 16 من كل شهر اشوف دموع ماقد شفت زيها عند اجهزة الصرافه )) المهم ان الشهر الفضيل هذي السنه اتسمت بالمسلسلات الحزينه وتقطيع الجيوب والله وبالله اني ماقد فتحته الا يا حياة الفهد تصيح يا ولدها يصيح يا بنتها تصيح يا الزبال اللي في الشارع يصيح يعني جابو لنا مرض بودميعه ماغير صياح وبكا لين اندبلت كبودنا ولا عائله طفرانه ولا عندها قوت يومها رغم انها في بلد زي قطر يعتبر الفرد فيها من اعلى مستوى دخل في العالم والعايله الثانيه بالكويت وايضا تتسم هذي البلد بالضمانات الاجتماعيه الراقيه الكفيله بحفظ كرامة كل مواطن المهم اني حبيت اركز على مين هاللي يكتب هالقصص المؤثره والعاطفيه لدرجة الخيال وفعلا يوم عرف وكانت المفاجئه هي ان الكتاب كانو سيدتين من عائلتين عريقتين كريمتين المهم فاضيتين ماعندهن شغل وهن كلن من الاخت فجر السعيد من دولة الكويت والاخت وداد الكواري من دولة قطر المهم كل وحده زوجها شرا لها كمبيوتر صخر وقالها يالله سلي عمرك وفكيني منك واطلعي من حياتي (( نعنبو دارك تطلعها من حياتك وترقمها بخشوم حياتنا؟؟ مصرف زوجيه حنا؟؟؟؟؟)) المهم ان الخوات كثر ماعاشو الدور واللعب بالعواطف الماديه والافراط في خلق المواقف المبكيه والمفجعه لدرجة ماعاد قمنا نركز غير بألاون وديكورات المستشفيات وغرف العمليات من كثر مايصورون بداخلها وكن حياة الخليجين بين السوبر ماركت واسواق بن دايل ومستشفى الشميسي وصارن العجز عندنا عقب هالمسلسلات يفحصون ويلتزمون بالمواعيد الطبيه والحفاظ على الادويه واستعمالها (( الله يرحم جدتي كانت تفضي غرشة الكحه وتحط فيها هيل وغرشة دوا الزكمه تحط فيها الليمون الاسود وغرشة المطهر تحط فيه الحبة السودا والمستكا )) المهم ان المسلسلالات هذي غثتنا ولما حبينا نفرفش اشوي ونروح لبرامج الضحك لقينها تبكي اكثر من سخافتها وفبركتها والضحك على شواربنا ولو على غباشي فما عليه شرهه لكن الشرهه والله على فنانيين خليجين كبار ولهم وزنهم ولهم ثقلهم على مستوى الوسط الفني (( جعل وسط فيفي عبدو يحيا اللي في عمره ماغشنا))

هان عليهم جمهورهم العريض اللي كان يكن لهم كل التقدير والاحترام وحترام تاريخ عطائهم الرائع المتمثل بمسلسلات اظهرت الابداع الفني الخليجي كما سجلت لنفسها اسطوره نعود لها كلما داهمنا الشوق في مشاهدة عمالقة الفن الذين صعدو على الهرم الفني وانتهو على طاولة محمد الصيرفي اامثال حسين عبدالرضا وخالد النفيسي وابراهيم الصلال وعلي المفيدي وحياة الفهد وسعد الفرج (( لالالا سعد الفرج ماهوب معهم فديت عمره ماقبل يضحك على شارب جمهوره ولا يغشهم )) المهم ان البرامج هذي السنه كانت من سقطه لسقطه واخر نجوم هذي السقطات طاقم وكتاب ومخرجين وممثلين طاش ماطاش في الحقيقه انه سقط كاأخراج وتمثيل لكن نجح نجاح عظيم وهذا من وجهت نظري بالطرح للقضايا صحيح انها تهريج و مكرره خمس الاف مره بس يعطي دليل ان النقد ماوصل ولزم التكرار ولا اقول الا اني اتمنى انه مايكون اخر سنه لني اخالف كل الكتاب اللي دعو الى وقف المسلسل وعدم الاستمرار بهذا الشكل لني اشوفه البرنامج الوحيد القادر على ايصال هموم المواطن للمسؤل (( خاصه لاكان المسؤل توه مخلص من صينة اللقيمات وسطل الفيمتو وصينية الجريش الله لايحرمني اياها السنه الجايه زي مانحرمت هالسنه منها)) المهم يكون المسؤل مروق على الاخر ويبدا يسجل الملاحظات والقضايا اللي تطرح (( قصدك ارقام هوياتهم )) واللي اتمنى انشالله ان طاش السنه القادمه يكون نواة عمل جاد يطرح القضايا بما انه يتمتع بهالكم الهائل من الحريه في التعبير ويفكونا من مسلسلات حسن الامام وسيناريو وحوار وعياط حياة الفهد واللي خلونا نشك بوجود اتفاقيه بين شركات المناديل والصيدليات وكتاب المسلسلات الدراميه واخذ العموله وشكل العموله هالسنه تعدت الشارب وطاحت بالحلق وكل خوفي لابكره شركات المناديل تحس بالفوائد هالسنه و تزيد العموله السنه الجايه وعقبه تجينا مسلسلات يتم تصويرها بالكامل في وسط مقابر العود ..

رفيع الشان

تعليقات 0 | إهداء 0 | زيارات 4350


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


تقييم
2.46/10 (532 صوت)

Powered by Dimofinf cms Version 3.0.0
Copyright© Dimensions Of Information Inc.

مجلة قصيمي نت Magazine Qassimy