• ×

04:07 مساءً , الجمعة 17 أغسطس 2018

قائمة

جديد مقالات قصيمي

قصة قصيدة مضى لي ثمان سنين في حبس خير شايع الأمسـح بن رمال من شمر رجل عرف بالحكمة والدهاء والحيلة ومن صفاته انه ليس له الا عين واحدة وقد...


قصة قصيدة يا هل العيدي عليكم مشرهية قصة وردت في عدة كتب روى فيحان بن دغيم بن هدبا المطيري ان عمه طلال بن هدبا وابن عمه غالب بن طلال بن...


قصة قصيدة ربعي مطير مطوعة كل مسطور عاش هــلال بن فجحان الديحاني المطيري بالكويت معيشـــة الكفاف إذ كان لايجــد ما يطعم به الضيف...


قصة قصيدة ذيب النشاما حافنا والتبشنا هذه الابيات لها قصة حيث كان الشاعر عايض بداي المطيري في أحد المجالس الشعبية، وكان به عدد كبير من...


قصة قصيدة الجاهل اللي جاب بصري يقنه نقض جروح العود والعود قاضي الشاعر الكبير بصري الوضيحي الشمري ابو شخير رحمه الله لما كبر سنه فقد...


قصة قصيدة تسعين خيبه للوضيحي نفيعه كان بصرى الوضيحي في بيت صفوق الجربا أحد شيوخ قبيلة شمّر ولم يكن صفوق موجوداً وكانت ((البندري)) ابنة...



الفضاوة

 0  0  3.5K
الفضاوة وطبعاً الفضاوة كلن يعيشها وأولها هاللي يقرى مقالتي الحين لأني أعتقد أنه لو كان عنده أوعندها شغل مهم ماضنتي لقا وقت يقرا هالمقاله. المهم أن الفضاوه اخلقت أعمال غريبة خلت الواحد يفكر بأمور يمكن ما تطري على أحد عشان ينشغل بها «انشهد من الفضاوه الواحد وده يمسك طريق مكه ويمتره بقلم رصاص ولايأخذ فوطه وسطل مويه ويروح ينظف قزاز المملكه» المهم أن الفراغ أو بلهجتنا الفضاوه اللي نعيشها خلتنا مثل البزر اللي واقف على سيف البحر ويناظر الرمل ولا هوب داري وش يسوي به قصر ولا سياره ولاعلبة آيس كريم المهم أن الفراغ القاتل يخلي الواحد يفكر بأمور غريبة وأنا واحد من هالناس اللي انتابني هالاحساس لدرجة أني فكرت أسوي زي الرحالة السوري الفاضي اللي ماعنده شغل وراز لي كم علم على كتفه وجالس يحوس بين هالدول بحجة إحياء التراث على دباب سزوكي ولا الرجوع للماضي وتراث أجدادنا بغلاية مولينكس الفرنسية اللي تشتغل بالبطارية المهم أنا أعتبره ذكي لأنه استطاع أنه يشغل نفسه بخرابيط لو يجيني ويعرض علي المشاركة معه كفخته بمساكة المطبخ حق المجلة ولاجبت حزام مقهوي المجلة (هاشر) اللي يقول انه هدية من أمه وضاحكتن عليه هالأم كل ما بغت منه يحول قروش قالتله ياهاشر ياماما لاتنسى الحزام اللي شريته لك حطه بعيونك ومن يومها الهندي يلف الحزام في وجهه ومخلي البنطلون عرضه لمساءلة الهيئة المهم كان خذت هالحزام حقه وربطته على سلة الدباب حقه.

نرجع لموضوع الفراغ وفي الحقيقه ماعندي حلول جذرية لكن عندي حلول مؤقتة لين ربي يوفقك (واقصد العزابي) في بنت الحلال وتلهي نفسك بمشاكلها مع اني أنصح جميع الفاضيين أنهم يتزوجون مدرسات عشان كل ما فضى جلس يصلح معها دفاتر الطالبات المهم عشان ماطول عليكم تعالوا معي أعطيكم بعض الطرق لاشغال الفراغ.

1 - اشتر سرير هاينز وفرش الريش من ايكيا واجعل فترة النوم لا تقل عن 18 ساعة «ما نبغى ناخذ اليوم كله شغل عط نفسك فرصه تاكل وترتاح وترجع تنام».

2 - اشتر خمس شرايح من أمهات 200 ريال واجلس في الثمامه وامسك الدليل واتصل على احد الاخوان السودانيين اللي في البطحا المختصين بالفول والقلابه واسأله عن الخلطه السرية حقتها داير كيف تسونها.

3 - حاول تشترك في أوربت أو الشوتايم أو أي من هالمحطات المشفره اللي نشترك بها وقلوبنا على البي سي وامسك ورقة وقلم واحسب كم يستفيدون قروش بالساعة لوفيه زيك فاضيين أكثر من 20 ألف.

4 - اذهب لحد المراكز التجارية وقف على بابها واجلس عد عدد الجزم «الله يكرمكم» اللي تطلع وتدخل وحاول تفرز ألوانها وتجمع الأوان بالأخير تشوف لون الجزمه الدارج بين البنات وبكذا راح تقدر تشغل فراغك في انك تعرف مين اللي ساكنة السليمانية ومين اللي ساكن خارج منطقة التغطية ومين اللي تستخدم بطاقات أمريكن اكسبريس الذهبية ومين اللي تستخدم بطاقات مرحبا امهات 25 ريال.

5 - حاول تشتري أشرطة مباريات كأس العالم الأخير وتشوفها وتشغل فراغك «يمكن لا رجعت الشريط للخلف ربي يهدي المنتخب الألماني ويقصي الفريق الأول حقهم ويخلي فريق الناشئين يلعب معنا وينغلب المنتخب بستة بس».

6 - وأخيراً حاول تشتري لك كيس رز 45 كيلو واجلس نظف فيه ولا خلصت تنظيف احسب كل كيس رز كم صحن بخاري يطلع منه وعقبه بتعرف مطاعم أحمد سفر للبخاري كم يربح في الكيس «العاطي في السما والفاضي في مجلة فواصل».

رفيع الشان
زيادة حجم الخطزيادة حجم الخط مسحمسح إنقاص حجم الخطإنقاص حجم الخط
إرسال لصديق
طباعة
حفظ باسم


القوالب التكميلية للمقالات

تعليقات وردود الزوار - أضف تعليقك

تعليقات وردود الزوار - أضف تعليقك ( 0 )

تعليقات وردود الزوار - أضف تعليقك ( 0 )


Privacy Policy