في
الأربعاء 20 سبتمبر 2017

07-12-2007 08:03 PM

فاجأني رفيق لي من كم يوم يقول لي فيه إنه حضر زواج في إحدى الدول الخليجية كلف 2 مليون ونص ريال صراحة صدمني بحكم أني من الطفارى سألته بخصوص المليونين ونص ذولا فيهم كم خمسة ريال عقب ما حسبتها لقيت اني أعبي حوض الدتسون بها بشرط يكون الحوض بشراع وحسبت حسبه ثانيه وهي لو نوزع المبلغ على ميتين عائله محتاجه كم يصير نصيب كل عائله؟ طلع معي 12500 ريال يعني اشباع 200 عائله لمدة ثلاث شهور بالخليج وسنة في مصر وثلاث سنين في الهند وباكستان وأفغانستان وعشر سنوات في رواندا وأثيوبيا تصدقون صديق لي في أحد الهيئات الخيرية يقول عندنا 322 بيت في كوسوفا يبغى له مواد بناء يكلف كل بيت حدود أربع آلاف ريال ويوم قسمت المبلغ على الـ 322 طلع 7760 ريال يعني المواد مع الفرش وحوض سباحه بدون نطاطيات اندفع كله في ليله واحده وشوفو وش تكلف فيه بس بالله لاحد يحسبها وراي لطلع كذاب لأني حسبت ورا رفيقي طلع المبلغ ناقص بس يمكن هو نسي شيء يقول أول شيء الزينة والتليفزيونات وحركات الدخان والليزر وتصوير سينمائي كلف فوق 000.100 ريال «يعني أكثر من هلا فبراير».

ويقول جابوا طقاقة أخذت في ذا الليله 90 ألف ريال لمدة ثلاث ساعات بس «وربي بديت أفكر أشتغل هالشغله والشغلة ماهيب صعبه راس مالها شيله وديرما وسبع خواتم».

ويقول أن الصواني اللي قدموا فيه البوفيه للضيوف من ذهب شرتها أم المعرس خاص للعرس بمبلغ تقدر بـ 190 ألف ريال «الله يذكر جدتي بالخير في زواجي جابت لي طاسه كانت تقطع فيها الخيار وتقشر فيها التفاح وتشرب فيها اللبن وتشرب فيها المويه وأحياناً تكفخني فيها وفي ليلة زواجي شافت الناس تهديني هدايا جابت طاستها وقالت لي شفت الطاسة ذي يا ولدي لا قلت إيه يمه وأنا مادن ايدي باخذها منها قالت أبشر عادني بجيب لك زيها».

ويقول ان أم المعرس يوم غنت الطقاقه لولدها قامت ورمت فوق اللي يرقصون مية ألف ريال «والله فاتتني ذي ولا يا زيني في رقصة ماكرينا اجنن».

ويقول إنه يوم دخلت العروس رمت فوقها قروش ذهب يقدر بـ 100 ألف ريال «حد يحوشها يا جماعه ولا يتصرف وربي المرأة ضيعت قروش الرجال» ويقول إنه جابو فنانه خليجية مشهورة بتدخل القفص الذهبي لها والمنيل للي بياخذها بعد شهرين المهم يقول انها خذت 200 ألف ريال «رزق الهبل على أم المعرس».

ويقول من مصادر مقربة له مدري من تكون ذا المصادر اللي عرفت الا انه متزوج خياطة يقول ان أم المعرس دفعت قيمة فستان العرس 70 ألف ريال «يعني قيمة سيارتي أربع مرات وربي ابدل معها اذا ترضى واكشخ به بين ربعي».

واللي زاد القروش ضيعه.. هو أن أم المعرس مسويه البطاقات بخيوط ذهب ويقدر كل بطاقه 800 ريال «يعني لو تدز لأمي وخالتي وعمتي وأختي هالبطايق أخذتها وسددت بها فاتورة النت وفوقهم أجدده سنة كاملة» ويقول إنه وزعت منها 500 بطاقة.

ويقول انها سوت كيكة طولها مترين ونص يعني أطول مني بمتر بالضبط «يعني بالموت ألحق أنا على الطابق الأول».

ويقول انهم شروا سجادة مصنوعة في إيران مخصوص مقدر قيمتها 250 ألف ريال بس عشان يمشون عليها ومن المعروف أن السجاد الإيراني كل ما دست عليه مع الزمن يزيد سعره «ما تخلوني أدوس عليه يوم واحد بس واختصر لكم الزمن وأزيد سعره؟!».

هذا غير صالة الرجال واللي كلفتهم آلاف الريالات.

في الحقيقة أكتب تشوفوني أتتريق وأنا في الحقيقه أحترق لكن مثلي في صرخته مثل صرخات أطفال الشيشان ما نسمعها الا لو بغيت اشوف مسلسل في محطه ومريت عليها بالصدفه ودي بس أعرف أم المعرس وش استفادت من تضييع كل هالأموال هل بتخلي ولد ولدها صالح ولا بيطلع ولد ولدها على محبة الله ورسوله بعرف كيف تفكر الأم ما عمري طمعت بشيء في حياتي غير أني أدخل في عقول الناس ودي أعرف أنا صح ولا هم اللي العقل عندهم يتبع قوانين العمل الوزاري في الالتزام بالعطل الرسمية.

لكن انتي يا أم المعرس بسألك وادري انك لو تشوفيني بيكون ردك سلبي لسبب بسيط وهو أني أنا اللي سألك شخص رقيب تحسبينه حسود وهو يعلم الله القهر يضوقه ست أيام في اليوم بناديك بأمي اعتبريني ولدك الي عادك بتزوجينه بسألك يمه بالله قولي لي القروش اللي بتصرفينها في زواجي من أولى بها أنا ولا طقاقات كل اللي يهمه انها تضحك على ذقون النسوان بإطراء القبيله أو العايله بأغنية تغنى لي ولغيري يمه من ظنك اللي بيستفيد أنا ولا مطاعم النصب اللي تبيعك الخمسين للميه لما تسوين طبخ يكفي ثلاث آلاف شخص والمعازيم ما غير 500، يمه تدرين أنه من فطر صائم كان له مثل أجره دون أن ينقص من أجره شي؟ قولي لي يمه كم صائم ظنك بفطرهم بهالمبلغ، يمه تدرين أنه يقول الرسول عليه أفضل الصلاة والسلام أنا وكافل اليتيم في الجنة كهاتين ويقصد السبابة والوسطى أو كما قال عليه أفضل الصلاة والسلام وتدرين يمه انه بـ 000.500.2 ريال ممكن تكفين 6000 داعية في افريقيا أو 4000 في آسيا.

تدرين يمه أنه هناك 000.100 عائله مشردة في بورما والفلبين والشيشيان كل ذنبهم يمه انهم قالوا لا إله إلا الله محمد رسول الله وانك انت وأمثالك لهيتي عنهم في هز وسطك ونثر شعرك بين خلق الله لا حيا ولا مستحي بحجة فرحتك بي في يوم عرسي.

رفيع الشان

تعليقات 0 | إهداء 0 | زيارات 4373


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


تقييم
2.43/10 (246 صوت)

Powered by Dimofinf cms Version 3.0.0
Copyright© Dimensions Of Information Inc.

مجلة قصيمي نت Magazine Qassimy