في
الإثنين 25 سبتمبر 2017

07-12-2007 08:04 PM

المقالة هذي بمناسبة مهرجانات التسوق، صارت كل دولة مثل سوق مركزي كل سنة تسوي تنزيلات وكنها طايحه البضاعة في كبدها. وتبغى تصرفها وطبعاً أساليب التسويق كثيرة تبتدي بمهرجان العايلة في دبي وتنتهي بمصر البيت بيتك «دعاية مجانية لدعم زلزال مصر» إلى أن دخلت الكويت وعمان والبحرين وسنغافورة ولبنان وتعز في معمعة المنافسة وطبعاً حنا يا الفقرانين المستهدفين بحيث حنا ووجيهنا يسمونا الطبقة الكادحة أي بمعنى الطبقة اللي تفتح حلقها أسبوع يوم تفوز بثلاجة قدم ونص وربي طول فترة المهرجان في دبي وأنا أشارك في المسابقات واشتري عشان آخذ كوبونات وكل اللي طلع لي رادو كوكا كولا من غير سلك هذا هو عندي مقطوط مغير زينه حاطه على الفاترينه بدل الشهادة فزت فيه يوم جمعت لي ستين غطى كوكا كولا يعني خسرت ستين درهم عشان يطلعلي في الآخر رادو بو خمسة من محلات أبو عشرة «للدلاخة عدة طرق وأنت ما شاء الله عليك تجيها من كل الطرق» المهم أن حنا يالمستهدفين يعتبرونا ساعات سيكو اللهم لا حسد لساعات رولكس يعني بالعربي حنا الهبلان اللي ينضحك علينا بالدعايات ويقولون قد تكون أنت الفائز بالمليون تسوق واربح «وربي لو أدخل السحب بروحي طلعت لي الورقة تقول: عادك أنت في دبي؟! أقول ضف وجهك بس هذا اللي ناقص ما عاد بقا إلا أنت» المهم مره كنت أنا والمدام قدام التلفزيون وطلعت الدعايه الخاصة بمهرجان دبي للتسوق. وقالت لي المدام وش رأيك نروح نفوز بالمليون ونرجع «بالله عليك عيني بعينك» قلت شوفي قولي أبغى أروح أتسوق لا تقولين أبغى المليون قالت أكيد لازم أتسوق ولا كيف أدخل السحب قلت لها صح ولا كيف ندخل السحب «لا.. نبيه» والمهم قلتلها يالله شورتك وهداية الله نروح ننبسط ونتسوق ونفوز بالمليون ونجي وخاصة إنه دبي تمتاز بالأماكن السياحية الوافرة - دعاية لدبي -(( فديت أهلها كلهم.)) المهم وصلنا دبي وخذت زوجتي للفندق وأذكر أن حنا ماجلسنا غير ثلاث دقايق بس رمينا الشناط ورحنا ندور الأسواق وقصدنا في البداية سوق الستي سنتر وأول ما دخلنا وقفت المدام واشهقت شهقة كنها راكبة قطار الموت وطالعن ابها على بعد 100متر ونازلن ابها نزلة وحده المهم أول مارجعت لوعيها وتأكدت أنها ماهيب في حلم قالت لي رفيع قلت لبيه قالت بوكك معك؟! قلت أيوه معي قالت كم فيه؟ قلت الخير كثير قالت كم يعني؟! قلت معي بطاقة ماستر وبطاقة فيزا وبطاقة الأمريكن اكسبريس «يا بختها فيك ما هيب لاقيه أطيب منك في التسديد لا رجعتوا» قالت حلو أجل تسوقنا وتقوم وتدخل واحد من هالمحلات وتقول ما فيه غيره في هالمركز ما غير تشتري اللي يجي قدامها لين ظنيتها مخاويها هذا تراه يا رفيع الوليد بن طلال وأناأ خوك، المهم عقب ما خلصت دفعت عشرين طعش ألف درهم وعطوني 100 كوبون سحب على سيارة وفاز يومها هندي بذا السيارة مشترك هو وخمسة من أصدقاه بكوبون واحد «وتقولون بفوز بالمليون؟! طيب» المهم قلت لزوجتي ها وش البرنامج الحين قالت وهي ماسكة كياس الملابس تصدق كن ما شرينا شي خفيفة الكياس «فديت خشتها تبي تشتري ملابس بالكيلو متعودة على السمن وتمر الحسا لا حرمني ربي منها» المهم قلتلها خلصيني الحين وين تبينا نروح قالت السوق وخلصنا منه نبغى الأماكن السياحية والتراثية قلت لها طيب تحبين نروح قرية الغوص ولا المتحف التراثي بدبي ولا بيت راشد التراثي وتقوم وتقولي وش رأيك يا رفيع نروح سوق نايف يمدحونه يقولون إنه أثري وقديم «قصدك محلات أبو عشرة فيه» المهم رحنا ويوم شرت من ذا البضاعه الرخيصه قلت ها وين الحين تبين نروح قالت الحين عاد وقت الانبساط قلت حلو تبين السيرك الأوروبي ولا سيرك الدلافين ولا تبين ملاهي الوندر لند «يا ليتني بنت وانت زوجي» قالت الحمد لله والشكر وش شايفني بزر أم ست سنين قلت طيب وين تبين أجل تنبسطين قالت نروح لقرية العالمية يقولون إنه فيه بضاعة من كل بلد في العالم «قولي كذا توني فهمت» المهم عقب ما خلصنا قلت الحين وش البرنامج عندك قالت عاد الحين جا وقت السهر نبي نسهر. «بعدي» قلت حلو تحبين نروح لمسرحية ولا سينما ولا نحضر ليالي دبي.

رفيع الشان

تعليقات 0 | إهداء 0 | زيارات 4709


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


تقييم
3.20/10 (226 صوت)

Powered by Dimofinf cms Version 3.0.0
Copyright© Dimensions Of Information Inc.

مجلة قصيمي نت Magazine Qassimy