• ×

03:52 صباحًا , الإثنين 16 يوليو 2018

قائمة

جديد مقالات قصيمي

قصة قصيدة مضى لي ثمان سنين في حبس خير شايع الأمسـح بن رمال من شمر رجل عرف بالحكمة والدهاء والحيلة ومن صفاته انه ليس له الا عين واحدة وقد...


قصة قصيدة يا هل العيدي عليكم مشرهية قصة وردت في عدة كتب روى فيحان بن دغيم بن هدبا المطيري ان عمه طلال بن هدبا وابن عمه غالب بن طلال بن...


قصة قصيدة ربعي مطير مطوعة كل مسطور عاش هــلال بن فجحان الديحاني المطيري بالكويت معيشـــة الكفاف إذ كان لايجــد ما يطعم به الضيف...


قصة قصيدة ذيب النشاما حافنا والتبشنا هذه الابيات لها قصة حيث كان الشاعر عايض بداي المطيري في أحد المجالس الشعبية، وكان به عدد كبير من...


قصة قصيدة الجاهل اللي جاب بصري يقنه نقض جروح العود والعود قاضي الشاعر الكبير بصري الوضيحي الشمري ابو شخير رحمه الله لما كبر سنه فقد...


قصة قصيدة تسعين خيبه للوضيحي نفيعه كان بصرى الوضيحي في بيت صفوق الجربا أحد شيوخ قبيلة شمّر ولم يكن صفوق موجوداً وكانت ((البندري)) ابنة...



حبي الذي لايموت

 0  0  1.1K
حبي الذي لايموت

في البداية ترددت كثر في سرد قصة حبي الاول ....ومثل ما يقال دائما وما الحب الا للحبيب الاولي....

المكان :سوق العقاريه,,,,,الزمان ::يوم عمري 18 سنة ونص وعمرها 16 وثلاثة ارباع السنة (شوفوا الدقه)...

القصة::ماعمري رقمت ولا ادري وش الترقيم ولا المغازل ..بس خلاص صار معي سيارة وعلى كثر تنتيعها الا انها تمشي..وفي الجامعه يعني كل شهر 1000 ريال الا عشره (الله يذكرتس بالخير يالمكافأة ) وتوني وقتها مطلع لي بيجر ...صحيح انه خط مشترك بيني وبين صديقي بس ولو يعني بداية حركة استقلاليه....المهم كان ذاك اليوم اثنين ..وطالعين من الكليه بدري يعني على الساعه 10 الصباح ..رجعت البيت شبعت نوم وعلى العصر قمت...شوفوا ترى للمبتدئين يفضل ان يكون الوقت بدري جدا جدا يعني اخف للضغوط النفسيه..وايضا لقلة المنافسين.......

رحت العقاريه في العصر وانا كاشخ بكل مايسمى كشخه...شماغ ملكي وطاقية من النوع اللي يغطي اذني وعقال كفر سيارة مبتدا ..والبيجر وسلسلته الذهبيه (على فكرة ذاك الوقت مرت سنتين على الجوال) وخاتم من امهات 100 ريال في الاصبع الصغير ونظارة شمسية من العراض ....المهم امشط العقاريه من فوق لتحت مافيها الا اربع طقم عجز,,وبنتيين لحقتهم ساعه وطلعوا بنات متوسطة يوم وصلوا الى ركن الايسكريم فتشوا ..وبنتيين ثنيتين هم كانوا الامل الاخير ...واحدة طويلة شوي وواحده يعني اقصر مني..وجلست الحق فيهم هم بعد فوق الساعه ونص ..من الدور الاول للدور الثاني ومن الدور الثاني للدور الثالث ..اذا اسرعوا اسرعت..واذا هدوا هديت..واذا وقفوا وقفت..المهم وصلوا الى عند محل ذهب ووقفوا وادلي اقترب منهم شوي شوي واشوفهم يلتفتون علي ولا يتحركون ولا شي .. قلت لنفسي بس ياولد السنارة غمزت وتعلقوا البنتين فيك ..طبعا ما قدروا يقاومون النظارة الشمسية ..واقترب واقترب اكثر يم الطويلة واطلع الورقة وباناولها لها ..الا وتصرخ القصيرة بترقم هذي يالشين..(لاحول بدت الغيره البنات كذا اذا شافوا واحد حلو بدوا يتطاقون) ساعتها انلخمت خفت ان القصيره هي اللي تبيني ..قلت والله اللي ودها تاخذ الرقم واذا ودكم مستعد اكتب الرقم في ورقة ثانية لكم الثنتين...قالت لي القصيرة بصوت عالي:عما وجع يوجع قلبك هذي شغالتي بس ما الومك على هاللوح اللي فوق عيونك (تقصد نظارتي الشمسيه) وارفع نظارتي ..والبس الطبيه ..(اعما ويغازل) والا اثر الطويله مو سمرا الا فحيمة وتقول لها القصيره افتشي له وتفتش طلعت شغالتها الاريتيريه ...بصراحة اول مرة اشوف واحدة برطمها فوق خشمها. حاولت الملم الموضوع وقلت لها ولو الزين مايحتاج لوحة نيون ينكتب عليها زين..قالت لي وجع وش هالامثال الغريبه.. .وامد لها الوريقة...والغريب انها اخذتها (ويقولون البنات صعبات ولايحبون المغازل اثاريهن يتمنعن وهن راغبات )..وما امداها تناظر في الورقة الا وتصرخ في وجهي قطع كاتبها بخط يدك ماتعرف تروح تصمم كرت انت ووجهك وتطبعه ..رديت عليها وانا بكامل سجيتي وشوله علشان الخساير بس.. هذا يوفي بالغرض ..المهم البنت راحت تقرا ..بصوت عالي العاشق الولهان المحروم ..هذا اسمك يالخلفه وانا اللي ابتسم لها ..وتكمل البنت هاتف رقم 426........هههه بعد الساعه 12 مساءا وجع لييه؟؟رديت عليه وانا مندمج في السجية علشان اهلي يكونون نايمين...ماعندك خط مستقل ولا اصلا وين عندك وهذا كرتك ...لحظة بيجر رقم ..115............# 3 وشوله هاللايكستنشن قلت لها رجاءا بلا اهانات ردت علي وهي مفزوعه وش اهانات اكتنشن يعني تحويله ..والا ارجع لسجيتي وابتسم لها واقول لان واحد من زملائي طلب مني تحويلة على البيجر فما حبيت اكسفه بس هو وعدني انه بيطلع بيجر مستقل له في القريب العاجل ....الا وتضحك البنت وتتحمد ربها ..وتكمل مع امكانية توفر جوال في المناسبات ...وشلون ماعندك موبايل؟؟ قلت لها وهي كانت في غاية الدهشة لاوالله ماعندي موبايل بس الوالد احيانا يستاذن من الدوام ويقول لهم انه مريض وياخذ اجازة مرضيه ويكشت للبر يالديرتنا وعلشان مايكشفونه انا اخذ جواله عنه ... وما مداني اتم هالقصة القصيرة الا والبنت تكرها ضحكه وبقوة بعد...بصراحة انت تهبل يا انت تستهبل ودمك خفيف ولا قروي ابن سبعطعش قروي ...انا توني باقول لها اني اتكلم جد بس يوم حسيت انها تحسبني استهبل قلت لها ...وش دعوى استهبل طبعا انا ياعمري استهبل ..وش رايك اعجبتك المزحة...وتقول لي دمك خفيف الله ياخذ عمرك ..الا عندكم صفر ولا ماعندكم باعطيك رقم موبايلي ..قلت لها وش دعوى عندنا صفر بالتاكيد...قالت لي خلاص بادق عليك بيجر وانت رد علي زين,,,ولا اقول لك خذ رقمي من الحيين 055خمستيين ثلاث خمسات خمسة...وتوني باطلع قلمي وورقة ...قالت يووه وانت بعد ياخي صفر والباقي خمسات..دق بعد الساعه 12 اذا تاخرت عليك ,, زين مو تنسى ...واحتمال انا ادق عليك بيجر باي الان ياحلو..........

واطلع من العقاريه وانا اغني (ائال بيئولوا الترقييم صعب وئال اييه وطق وشتايم وماني عارف ايه...وياتمسكك هيئة يا يجلدك اخوها ولا وش اللي انا ناسيه..اول مرة رقمت انا فييها كانت اسهل من الميه ) طبعا الايقاع كان خبيتي ,, المهم من العقاريه الى بيت صديقي محمد واطق عليه الجرس ويطلع لي ..(محمد هو اللي خاشرني معه اقصد مشركني معه في رقم بيجره) واقول له وش لي عندك يا ابو حميد قال امر امر قلت الله يسلمك بس هالليلة سكر بيجرك طلبتك تسكره قال لي ليه عسا ماشر ..قلت له شبكت بنت وقالت لي يمكن تدق عليه تعرف البنات غشمان في امور الاشكنسنششنشن قال محمد لي وش الاكشنسشنششنشن قلت له التحويله يعني يابو حميد الى متى باعلمككل شي,,ياناس تثقفوا,,ماني عايش لكم بتلة..المهم جلس محمد يوعدني انه بس بيرد على الارقام اللي يعرفهم وانا اتحبب فيه يقفل البيجر ونشبة في حلقه لين وافق...قلت له طيب ممكن طلب ثاني يابو الكرم يابوحميد قال لي سم امر وش بغيت ..قلت له بكره انشالله باقدم على بيجر جديد ورقم جديد وهالرقم هدية مني لك..قال لي وش المناسبة قلت له ابد سلامتك ابي تتنازل لي عن هالرقم ..صرخ في وجهي معصي تراك مصختها انت وخويتك اللي هذا اوله ينعاف تاليه ...قلت يابو حميد وش فيها ..ياخي انا صديقك ثانيا البنت مبين عليها بنت نعمه تصدق لها شغاله بروحها ... وانشالله انشالله اذا ضبطتها اني اشبكك مع صديقتها ..قال لي محمد وهو بادي يخر صديقتها حلوة عاد ..قلت اسمع وش يقول هذا قال ايش حلوة الا موت احمر بنت شي ولا في الافلام بس خويتي احلى ...(كاني شايف وجه البنت اللي في العقاريه)...ووافق محمد وقاللي بس لاتتاخر علي يابكرة يابعده الرقم الجديد يكون عندي والبرمجة ترا عليك ..(25 ريال) طقيت صدري له وقلت ابشر غالي والطلب رخيص انت تامر طال عمرك..

وبعدها رحت لبيتنا ..وسويت كم حركة تموية على بيتنا اني نايم بدري وانا مطفي كل الانوار عدا الاباجورة اللي جنب السرير..وجت الساعه 12 وعيوني تحوقل (تبترم يعني تطالع بتركيز في )على بيجري وتجي الساعة 12 ولا احد يرن لابيجري ولا تليفوني .ومامرت خمس دقايق الا بدى قلب العاشق ينطبخ ..نست ولا ضيعت رقمي ياربي ياربي.. ادق عليها ولا استنى ادق ولا ما ادق..وولد الرياض ماينشره عليه,, الا وارفع السماعه وادق على موبايلها صفر خمستين خمسة ثلاث خمسات ...تننط تنننط ..الو مرحبا (صوت رجال يحتسي من سقف حلقه) ياربيه وش اقول له ارد عليه ولا اسكت توهقت معقوله هذا اخوها ولا يمكن ابوها ..وشوي شوي استجمع قواي واقول له هذا بيت عبدالرحمن (صدق ماني وجه جوالات ولا احد يدق جوال ويقول هذا بيت فلان ) ..ويرد علي ذاك الصوت ..تستهبل يالشيخ ولا انت شكلك لعاب ..بس هيّن دواك عندي انت واشكالك انت عارف انا من يومك تدق علي وتزعجني هااه انت عارف انا من ووش اقدر اسوي بك؟؟..ساعتها حسيت اني تجمدت في مكاني وزرقت اطرافي وحسيت ان انفاسي بتتوقف ..ورد علي ذاك الصوت ..بس هين الحين اتصل على الهاتف يوقفون رقمكم ولا الشرطة يجرونك مع اذنك علشان تعرف تزعج عيال الشيوخ عمانك يالشين.....الا وتطقني النفاضه ..لاواللي يرحم والديك ياكريم يابن الكرماء ويرد علي يعني تتريق انت ووجهك..قلت له لا والله..الا اني صادق بس واللي يرحم والدينك في الجنه تراني كنت في لحظة طيش ياليتك تسامحني وتعفي عني تراني زي اخوك الصغير سامحني سامحني الله يخليك....واللي يخليك ماتعودها ..احب رجلك ياشيخ..وسكت ابو صوت جنان شوي ثم قال باسامحك هالمره بس لو تعودها مايكفيني فيك الاالذبح ..انت سامع؟؟ قلت الا سامعين انت تامر طال عمرك ومادريت الا يردع بالسماعه على وجهي..وجلست في غرفتي متقرفص كلي فوق بعضي متقبط في مكاني ولوني رايح وصوتي مختفي..وحاضن التليفون بيدي خايف لا الشرطة تتصل ولا ذاك يعلم ابوي علي...وبعد ساعه يعني على الساعه 1 وربع الا والتليفون يرن والقطه وانا اقول وصوتي كله لهثه. . سامحني واللي يرحم والديك ما اتعودها...الا واسمع ضحكة بنت طلعت هي اللي رقمتها في العصر في العقاريه ..وتقول لي وش رايك فيني مو جريتك جرة على اذنيك.هاه طاح قلبك صح .قلت لها يعني ذاك الرقم مو رقمك قالت لي وهي تضحك يعني لو رقمي انت ووجهك باتعرف على اشكالك ثانيا وين احنا فيه اصلا لو الهاتف كانوا طيبين ويمشون بالعدل ولايفرقون بين احد هالرقم مايصير مايمكن ابدا ابدافمابالك بشركة الواسطات اقصد الاتصالات بس انا حبيت اطيح قلبك علشان اذا كلمتك مايصير عندك فكر ولاانت قادر انك تكذب ولاتنصب علي ...ياشاطر.(والله العظيم اللذي لا اله الا هو لو ماهي بنت اني كنت لالعن والدي والديها على طيحة القلب) ..بس قلت ياولد مادام بنت ياقلبي خلها تتدلع ..وباستخف دمي عليها قلت وانتي على بالك اني دقيت على الرقم اللي قلتي لي عنه بس اخذك على قد عقلك قالت لي البنت ايه مرة صدقتك انا ..والله من يسمع صوتك يعرف ان قلبك في ولامانيب قايله....وتوني باتلفسف الا تسكتني بسؤالين على الطاير .

عندكم سنترال ؟؟وعندكم كاشف؟؟ولاتكذب علي رجاءا ؟؟تراني اكشفك بالراحه.....وارد عليها بمعنويات مرتفعه ايه..قالت لي اجل لايكثر حكيك ورح انزل عند الكاشف وامسح رقمي لايسالك ابوك عنه بكره الصبح....توني بالف واتفلسف عليها وتقول لي يووه ياشيخ انقله في ورقة بس اخلص علينا رح امسحه وخلك عاقل...ورحت زي الفار ومسحته على فكرة مو خوف منها الا بقايا نفضة راعي الجوال هذاك. المهم واجي على اساس اني باسولف معها وارقع مايمكن ترقيعه ...سئلتها وش عجبتس فيني؟؟قالت لي خير بشويش يالمملوح لاتشقق بس من كثر الزين مافيك شي زين اصلا..فرديت عليها بسؤال اخر مباغت (قروي مان بروحه) اجل ليه دقيتي علي لاتقولين من الملل قالت لي يووه كانك عارف لا الصدق ضاع رقم صديقي هع هع هع امزح معك الصدق الصدق انكم ياعيال الكلب يؤ يؤ سوري اقصد ياعيال هاليومين زي الجحه مهما تفحص فيها مايندري هي حمراء ولا بيضا ..الواحده لابد ان تجرب وتحدد رايها ..قمت على بالي اتميلح نفسي قلت لها طيب وش انتي شايفه الى الان ..حمرا ولا بيضا ..قالت والله النية تقول جحة بوسطها سرو..صرخت عليها سرو في عينك اسف قصدي عين العدو ..والله اني حمرا وعلى السكين بعد.. قالت لي وهي تضحك مدري انا داقه على بيت ولا عتيقه...ياعمي طير موب انا الحين اكلمك هذا اهم شي عندكم انشالله لو اشتم فيك الى بكره الصبح يعني بتسكر انت ووجهك ....قلت لها طبعا ..وتشهق البنية باعلى صوتها وشوووو؟؟ قلت لها بكل حنيه طبعا لا معقوله اسكرها في وجهك.تنقطع يدي انشالله قبل لا اسويها. قالت لي البنت اشوا على بالي ....قمت على اساس اني شبكتها خلاص من قدي قلت لها كم رقم جوالتس ؟؟ وترد علي البنية خير خير عسا ماشر مطيح الميانه ابو الشباب ومنزل الشباك عسا ماشر المكيف عطلان يعني...قلت لها هاه لابس من باب اننا خلاص قالت لي خلصت روح الشيطان متى مابغيت عطيتك رقمي بكيفي مابي هذره زايده...مفهوم وانا طبعا لا اراديا قلت لها مفهوم....(رجاءا ترى هالشغله يمرون بها كل العيال يعني المكالمة الاولى تكون لصالح البنت 100% فيعني هذا شي طبيعي ولاتصدقون اللي يقول العكس).على العموم انتهت المكالمة بقولتها لي على فكرة لك مستقبل يكون دمك خفيف.

ومر اسبوع وخويتنا بالله كل ماجت الساعه 1 الليل مدري الفجر تدق علي مرة تسولف معي كانها مديرة مكتب احد الوزراء ربع ساعه وتقول لي مشغوله عن اذنك ومرة تقول واحد من الشباب راح للقهوة وكرشته الهيئة نجلس بالاربع ساعات..ومرات تنكبني ..تقول لي ما اقدر اكلمك من البيت بس مشتاقه لك ولسواليفك لو ماني خايفه عليك من ابوك كان طلبت منك تكلمني على الموبايل حقي (ابشركم خذيت رقمها ) وطبعا زي أي شاب سعودي اطق الصدر ولاعليتس اصلا ابوي فري مرة (امحق فري ما انسى يوم قلع فيوز مكيفي يوم وصلت فاتورة الكهرب 400 ريال في الصيف الماضي ) تصدقون مرة على الموبايل 5 ساعات ونص ..بس يالله من اجل خاطر الحبيبة صح نص الوقت يروح في اصبر شوي بروح ازين جلستي ومرة بافك كلبسات شعري ومرة باولع النور ومرة لحظة باشبك الموبايل على الشاحن,, هي تضيع وقتها وعداد شركة الاتصالات يحسب جزاه الله خير بس,,, و دامي بانطق بالعقال والله لايعوق بشر من قبل الوالدعلى الاقل انطق وانا مستمتع بقيمة الطق هذا اقل شي ينعمل ...(تفكير سعودي 100%) ..المهم مرة من المرااير خشت علي بمقدمة رومانسية اول مرة تجلس معي ربع ساعه تقول لي ياحبيبي وياحياتي وانت عمري والله اني خاق على نفسي ساعتها احس ان المكان اللي تحتي رطب بس ولو الواحد من وين ووين ..بيسمع كلام حلو,,طلع المكان رطب من جد اثر علبة البيبسي منكبة من تحتي وانا مسرح في عالم الخيال ومادريت الا ملابسي امتلت وفراشي امتلا وصارت فضيحتي في جلاجل في البيت(فهموا البيبسي غلط..الله يسامحهم). المهم استمرينا هالاسبوع واحساسي يزيد يوم عن يوم بانها مسيطره على الوضع الامر اللي كان مهدد برستيجي وعلى قولة ابوي الروحي (نزار قباني ..الحب معركة كبرى )فانا على كذا وضعي مدحدر ..فقررت ومعروف عني على فكرة بان قراراتي حاسمة وجباره ..بان اباغتها بالهجوم فدقيت عليها الموبايل في المغرب وكانت طالعه مع زميلاتها في كوفي شوب ..

تنتتتن تتنتتن الو هلاا كيفك ..يابنات هذي اختي الكبيره..

لا ماني اختك لاتنصبين بس..اقول لك اولا اشتقت لك ثانيا ابي اشوفك؟؟

وشوو وش تحكين اصبري علي اذا رجعت البيت تفاهمنا الحين انا مشغوله ..اذا رجعت انشالله يصير خير .

لا مو يصير خير الا يصير شر انا قفلت معي ..ردي علي الحين الحين موافقه ولالا هااه بسرعه لاتفكرين...وش قلتي؟؟

خلااااص يووه منك موافقه بس اذا رجعت البيت نتفاهم بروح معك بس الوقت اللي احدده انا ..يالله بااااااي

لحظتها حسيت احساس أي رجل غبي يظن نفسه انتصر على امراة (ايه هيّن بالمشمش) المهم رجعت هي للبيت بعد صلاة العشا بساعه ودقت علي ..وماعمري شفت الهنوف (اسمها وانا قايل لها اسمي الحقيقي عبدالعزيز) بهالرقة والطيبة والنعومة ابدا ارق من النسمة واعذب من الماء الزلال كل ماقلت لها شي وافقت اقول قولي احبك تقول لي احبك واموت فيك اقول ابي بوسة تعطيني عشر ..المهم رجعنا لموضوع الديت الاول كنت احسب انها بتتهرب منه ..بس لقيتها موافقه ..وتوني استعرض عليها الاسواق والسوبرماركتات وترد علي ياقدمك ياسخيف قصدي يا حياتي في احد الحين يواعد في مثل هالاماكن ماتغار علي على الاقل انا اغار عليك سالتها طيب وين قالت لي شف بنت خالي دكتورة اسنان في مركز (ام الضروس لمكافحة السوس) وش رايك نتواعد هناك ..قلت لها انتي صاحيه .. قالت لي ماعليك انت رح هناك المغرب وقل ابي اكشف عند الدكتوره هدى ماعليك تراها فري وعارفه عننا كل شي وكلمة السر ضرسي اللي فوق على اليسار يوجعني مرة ,,انا ياباسبقك يابجييك على طول.

والمهم يروح عنتر اللي هو انا للمركز ويقابل اللاستقبال واطلب منه اني اشوف الدكتورة هدى وادخل عليها وابتسم في وجهها ..بيني وبينكم وجه هدى لاهو وجه فري ولا وجه واحده من اساسه مستلطفه الرجال قالت لي نعم قلت لها ضرسي اللي فوق على اليسار يوجعني ..منتبه لي ضرسي الي فوق على اليسار يوجعني قالت طيب اجلس على واجلس على كرسي اللي عند المكتب قالت لي لا اجلس على سرير المرضى ..قلت لها بكل بلاهة ليه مو قلت لك ضرسي اللي فوق على اليسار ..قالت طيب انطق على الكرسي وبلا لكاعه ..ومادريت الا انها تقول لي افتح فمك قلت هيييه وش القصة لايكون جد بس..قالت شف كلها دقيقة والالم يخف صدقني ..وافتح فمي وتغزني بابره ..وتبدا تحكي معي مو انت اللي كلمتني الهنوف عنك ...ساعتها انشكحت أي انشكاح ..ومددت رجولي واسترخيت ..وقلت للدكتورة وش قالت لك الهنوف عني ومتى بيزول الالم ..تضحك الدكتورة وتقول لي لاتخاف الهنوف فهمتني كل شي عنك بالتفصيل الممل ..ومامرت خمس دقايق الا اشوف الدكتورة تلوح لي بملقاط مدري منقاش وبوسطة سن قالت لي شفت كل شي سهل,, من اليوم ماراح تحس بالم مرة ثانية على فكرة ضرسك مسوس مرة انتبه للباقين زين..وانا ابتسم لها انشالله ...لااااااااااااااااااااااااااء سننننننننننني ضرسي وش سويتي ..قالت لي مو هذا اللي يالمك ..انا كلمتني واحده اسمها الهنوف على ما اظن انها اختك وشرحت لي انك خجول من النساء كلهم وان ضرسك مايخليك تنام الليل يالله الحين وش رايك بترتاح من الليلة...وانحاش من المركز وانا اصارخ ضرسي ضرسي والدكتورة وراي والسيكورتي تبع المركز لاني مادفعت الحساب ...ثيابي امتلت دمان وحالتي حاله ونفسيتي متحطمة حزنا على ضرسي ..وادق على جوال بنت الناس (والله تمنيت ساعتها انها ولد علشان الواحد يفضفض عن نفسه ويزيح عن قلبه ) وادق عليها وتوني اقوول لها الووووووو انتيي هنااا الا وترد علييي آآممموووااا وش رايك بالمزحه ياحياتي (وزي أي شاب سعودي هالامموووااا جايبة روسنا في الارض طفيت ...) وقلت لها فداك الضرس اللي راح والضروس اللي بتروح والخشه كلها ..وتضحك معي وتقول لي ترى مادري وشلون ياحياتي سويت بك كذا .. بس صدقني حبيت امزح معك وتطقها بكوة وتقول لي انا ماعرف امزح ..انا بايخه وجلست تصيح ..وانا اللي ضرسي طار وخشتي تخرخر دمان والف واحد يطاردوني ..جالس اراضيها واقول لها لاوالله مزحك حلو ويفتح النفس اصلا اول مرة احد يمزح معي هالمزح اللي يفتح النفس..واجلس اراضي فيها واصالح كني انا المخطي الحين ,,,وتدلي الهنوف تناشق بخشمها وتقول يعني مو زعلان مني ياحياتي ,,وانا اقول لها ابدا لايمكن اهو دا اللي مش ممكن .قالت طيب اثبت لي ...قلت لها بس كذا سهله آآآممموواا قالت لي لااااء مو كذا ابيك توافق قلت لها اوافق على ايش قالت ديت ثاني وقريب بعد ....قمت انا لا اراديا اسمحي لي يعني توني في نزيف من عقب مزحتك ..الا وترجع الهنوف تونون ..يعني الى الان زعلان مني اهيء اهيء اهيء واااااااااء ..قلت لها لا ياحبيبتي موكذا والله قالت لي ا لا الا الا انت زعلان مني انتا ماتحبني قلت لها الا والله بس ديت وخصوصا وانا بدون ضرس ماتحسين انها صعبه شوي يعني في فمي تسريب الان يعني انتظريني سنة اركب سن تركيب ولا سنتين اضمن قالت لي لا موعد قريب وقريب جدا ولا بازعل يرضيك اني ازعل ...قلت لا خلاص كل شي الا زعلك ..وين تبيننا نلتقي فيه انتي بس حددي أي مكان يعجبك .قالت لي خلاص اليورومارشيه .. بكرة المغرب توقف عند مقهى ستوب باب العوائل ..قلت وين انتي هذاك ديت علني قالت لا لايهمك انا بانتظرك على اني اختك بس اسمع ابيك تلبس جزمة صفراء و وشاح (شماغ لونه بيج ) وثوب ابيض وطاقية زري وخاتم فيروزي قلت لها خير وين احنا فيه هذا ديت ولا عمل سحر قالت لي لا ماعليك اسمع مني ولا يهمك ..علشان اذا سالوني الهيئة اقول لهم هذي اوصاف اخوي ...وفعلا من صباحية اليوم الثاني انتق لمقيبره (كفوي ) واجمع هالاغراض الغريبه صح كلفتني 800 ريال يعني المكافاة الا شوي ايام عز المكافئات ...المهم ومن صلاة العصر ارابط في اليورومارشيه ..وعلى حسب اتفاقنا انها بتجي وتخبط كتفي بشنطتها (الديتات ايام الرومانسيه) المهم وانا انتظر الا تجي بنت وتخبطني على كتفي الا واشوفها قبالي وتوني باكلمها والا تجيني خبطة على كتفي الثاني ..ياربي وش ذا المزح الثقيل والتفت من الجهة الثانية الا ورجال الهيئة يتمقلون فيني وانا مبلم ...ساعتها جاني ابو لباس (مدري وش ابو لباس بس اسمعه في المسلسلات الكويتيه) وتوني باكئكئ حسب الخطة انها اختي واني انتظرها الا واسمعها يعني الهنوف تصرخ ...شفتوا بعينكم انه يتحرش فيني انا ماسويت شي ..قلت بس انتي اختي موو.قلت ياعمي طير تلاحقني في السوق ساعه ..وانا اقول لها وش ساعته طيب لواني مو اخوك ليه تخبطيني بالشنطة على كتفي .. قالت من قهري يا اخي ذبحتني احرجتني في السوق وانت تدور وراي بالله وش تبيني اسوي لما واحد بهالشكل المقرف يلاحقني ..وتوني بادافع من نفسي الا واحس اني مشيول على كفووف الراحة ومافتحت عيوني الا في صالون الهيئة (96 بني ) واخر شي اخبره ان اربعه طلوا في وجهي ومن ساعتها ماصحيت الا انا مربط على كرسي في المركز وجنبي 6 اسنان وضرسين ..وانا اقول ياربي مشبه علييهم وين وين الا طلعوا من خشتي ..بس صراحة بنج الهيئة ولا بنج الدكتورة بالراحة ومن جرعه واحده الا انا خادر في الارض ....وتوني بادي اصحصح الا وهم اعني اعضاء فرقة الصاعقه (الهيئه) مقبلين علي ..جلست اصارخ بس يكفي خلاص ابي اسناني الباقيه صار في صدى في فمي وبرد من كثر الفراغات ...قالوا لي ماحنا مسوين لك شي بس هذا ابوك بيوقع على تعهد عنك لانك احمق ولست بمصدر ثقة ..وخلنا نشوفك متعودها مرة ثانيه.ياويلك لو نصيدك ....فاهم ..وانا مربط على كرسيي واصارخ فاهم فاهم والله العظيم فاهم ...المهم وقع الوالد وطلعني وماقصر الولد تمرن على طب الاسنان علي ونقش له على الطاير نابين علويين بحركة بهلوانيه باسفل الزبيريه ( هذا موضوع ورقة بحث في آخر مؤتمر عالمي لطب الاسنان) ...المهم بعد هذا كله بكل امانه كرهتها ولو الهنوف قدامي والله لانتف شعر خشمها تنتيف ...وفعلا وانا الملم في عظامي في منتصف الليول ولا يرن التليفون على الساعه 2 الفجر وطبعا مايهون التليفون علي وارفع السماعه الا وهي على الخط ..كل الكلام اللي جلست احفظ اقوله لها من شتم وسب نسيته يوم قالت لاتزعل مني ياحبيبي وطقتها بكوة (يعني صاحت) وانا اسفه وما استاهلك وسامحني تراني غلطانة من ساسي الى راسي بليز بليز ..وما مرت دقيقتين الا انقلب الوضع تماما صرت انا اللي اصيح وهي اللي تهديني بس ياحبيبي بس والله ما اخليك......(ماقلت لكم اني شديد )...وزي العادة رجع عنتر لعبلته ورجعت عبلته لمقالبها ..صح انها كانت مرات طيبة معه يعني قد ديتها صدق وقابلتها كذا مرة ..الى ان ..جاها النصيب وتزوجت ...طبعا زي أي اثنيين سعوديين لازم يفترقون في الاخير ..وقبل زواجها حلفت علي ولزمت اني لازم احضر وقالت لي في قصر الافراح والليالي الملاح وطبعا رحت ذيك الليلة لذاك القصر وطلع عرس عبنده افتح واحد فيهم واخفهم برطم ماشاء الله كفر ماشيلان ..ومن نص العرس زيران وطق واستنزالات وطيحة قلب تخرعت لين قلت بس ...طلعت حبيبة القلب تبي تتاكد اني ما اظهر في ليلة عرسها ومالقت الا هالطريقة ..المهم طلعت حبيبتي طيبة وكّلت احد صديقاتها فيني الى ماصديقتها تزوجت ووكّلت فيني صديقتها يعني اصبحت في سلسلة غير منتهية عرفتوا ليه انا اسميها حبي اللذي لايموت
زيادة حجم الخطزيادة حجم الخط مسحمسح إنقاص حجم الخطإنقاص حجم الخط
إرسال لصديق
طباعة
حفظ باسم


القوالب التكميلية للمقالات

تعليقات وردود الزوار - أضف تعليقك

تعليقات وردود الزوار - أضف تعليقك ( 0 )

تعليقات وردود الزوار - أضف تعليقك ( 0 )


Privacy Policy