منتديات قصيمي نت - عادات الاوليــن والتاليــن ..

:t006hgf:

(qq137)

راح نطرح لكم موضوع مميز وجديد على قسمنا الا وهو العادات والتقاليد السائدة في مجتمعنا وما حصل لها من تغيرات

وكل مرة راح نطرق الموضوع ونقارن بين عادات الأولين والتالين من هالجيل .

( الــــــــــــــــــــــــــــــــــزواج )

واليوم راح نتكلم عن موضوع عادات (الزواج) بين الماضي والحاضر ونشوف أكبر التغيرات اللي حصلت على حفلات الزواج ..

المهم ياطويلين العمر منول كانت حفلات الزواج سهله ميسرة ما فيها أي مظاهر من البذخ والإسراف من أول ما يفكر

الولد في العرس الين يدخل عليها ذيك الليلة وهو كل شي مسمحه ربي له ( مهوب مثل الحين الله يخلف(qq136) ) .

نبداء أول شي من الخطبة .. أما تخطب له أمه وألا أبوه يقولون له والله يا عند فلان بنت فيها سنع وظفاره وأدب

وأخلاق وفوق كل هذا كنها غزال . عاد تخبرون منوال إذا قرر الابو والأم يزوجون الولد والا البنت طبعاَ تصير البنت

والولد أخر من يعلم وبعض الأحيان يخطبون ويملكون مادرت البنت كل هذا طبعاَ لأن البنت والولد في شور أهلهم وما

يعصون لهم أمر ما شاء الله , عاد إذا وافق الولد راحو يخطبون ويخلونه يشوف الشوفه الشرعية ( هذا وجهي أن خلاها أبوها يشوفها(qq168) )

أما يشوفها تروى والا عند القليب والا تحش والا تذكرها له أمه أو أخته ومن هنا يبدأ يرقع قلب الولد وتبدأ حركات

التوزي ورى النخيل ومناظر البنيات والتسدح عند السواقي والترزز عند القلبان خطر من العشق يطيح في القليب , المهم

يالربع كل هذا يحصل والولد تو عمره 16 أو 17 سنه هذا دليل على ان الولد من عمرة وهو متحمل مسئوليه ورجال يعتمد

عليه في كل شي ( أبو 16 , 17 في هالجيل والله ما أأمن أحط بنتي عنده سفيه على قول جدتي (q69) ) .

الحاصل عاد إذا اتفقوا على كل شي روحوا أهل المعرس قبل العرس بشهر أو 20 يوم السوق اللي هو مهر العروس

صندوق فيه أنواع قطع من القماش وعباة لها والامها وخناقه وزناط ( اتحداكم تعرفونها (q33) ) الخناقه والزناط أيام

جدانا وأيام أبوانا وأمهاتنا يرسلون صف لبن والا رشرش وغوايش دقة عبد الغني وبعض أنواع العطور ( لاحظو إن أهل

المعرس هم اللي يجهزون للعروس والله لو يسونها الحين ان تمد لسانها العروس وتقول مو على كيفكم أنا اللي بعرس

وألا انتم (qq167) ) ويرسلون معه طياق قماش وطياق شيال بور سعيد وسراويل خط البلدة عاد هذا يوزع على أقارب

العروس .

المهم عاد إلى جا يوم العرس يجتمعون المعازيم للغداء بعد صلاة العصر ويجي المملك ويقلطون لهم جريش وقرصان

ولحم , ثم يتفرقون بعد الغداء وذا جا بعد صلاة العشاء يجتمعون ثانية ويتقهوون بس قهوة وبعدين يدخلون المعرس على

عروسه في بيت أهلها في الروشن (<<< اشوا انهم قطعو هالعاده كان وين أحط رجلي فيه , إذا جا عندنا عرس صار

في البيت انفجار سكاني(vv) ) عاد تصير العروس متزينة جايه وحده تخضبها بالحنا وتمشطها بالمشاط الأحمر ثم يحطون

لها عشرين ضفيرة ثم يلبسونها ثوب العرس من هاللي في الصندوق والعباة هذا كله المغرب بعدين تجلس عندها الربعيه

اللي هي المدخلة لين يجي المعرس ويدخل على حرمته ثم يعطي الربعيه فلوس أن عطاها كثير مدحته وشكرته وان

عطاها شوي سبته ( ما ينطاح في السان هالربعيه ) وبعدين تروح وبعض الربعيات تجلس وتنام عند باب هالروشن ثلاثة

أيام أن بغت العروس ماء وألا شي جابته لها . عاد بعد ما يدخلون المعرس يبدون البنيات والحريم في الردوه والردح الين

وسط الليل اللي هي تقريباَ 9 ثم يتفرقون وذا جا بعد ساعتين من دخول المعرس على عروسه جا المقهوي يقهوي

المعرس ثم يروح ( <<< والله النشبه قد انه ينكد عليهم و بس(qq15) ) والى جا من بكره تغدو في بيت أهل المعرس وفي

الليل اللي هو يسمونه التحوال يجتمعن الحريم في بيت أهل العروس ثم يشلون قش العروس ( المضرب , السحارة ,

الوسادة , والشف ) ثم يرحون البيت أهل المعرس ويحطون قشها ثم يقهونهم هم يتفرقون .

هذا كله عرس منول ما فيه أي تكلفه أو أي خساير كل اللي يكلفهم بس هالسوق أو هالطياق اللي يرسلونها .

أما عاد وقتنا الحين ما يحتاج أشرح أو أقارن الكل عارف ابرز سلبياته بس راح نستعرضها ابرز ما فيها ..أول شي نبدأ

من الخطبة عيال الحين مدري وش فيهم على العرس ما عاد يعرسون إلا بعد التشحيذ والحنه هذا وعمرة فوق 27 << هذا

الصغير منهم غير اللي يطق 30 ما أعرس ويقول توي صغير ( وين صغير معه أبوك يومه في عمرك قد جاه خمسه من

أخوانك(qq1) ) عاد بعد ما يحنون عليه ويصدر الموافقة يبدأ يعطيك شروط تعجيزيه ما تحصلها إلا في حور الجنة .

هالكلام ترى ما ينطبق على كل الشباب البعض منهم والبعض الأخر ما شاء الله عليه ما يبغا إلا بنت أجواد ستيره , المهم

عاد تبدأ رحله البحث عن عروس المستقبل وتبدأ ألام والأخوات وبعض الأحيان تمتد للخالات والعمات وتصير مشكلة الشرق

الاوسط , عاد تصير ألام والأخوات كل ما راحو لم عرس وألا جو من عزيمة قالو له شفنا بنت فلان ذيك الزينة اللي تهبل

اللي تقول للقمر قم وأجلس محلك وشرايك نخطبها لك <<<< لاحظو ما همهم إلا الزين وطبعاَ ما نغفل الأخلاق وألا

السنع والظفاره والاجتماع مع الحموله وحشمة أم الزوج كل هذا راح وراحت أيامه الله يخلف ما همهم إلا الزين عكس

منول طبعاَ . وبعض الناس الله يهديهم إذا جو يدورون الولدهم ما يدورون اللي حبيبه وسنعه وتحشم أم زوجها لا يبغونها

واجهه اجتماعيه يبغونها زينه وطويلة وتواجه إذا راحت معهم للعزايم والعروس ( <<< هي تحفه وألا مرة ولد (qq166) ) .

المهم يالربع بعد ما يخطبون ويتفقون يروح الولد يشوفها الشوفه الشرعية تدخل عليه البنت أما بكاس عصير وألا شاهي

وألا قهوة ( بس إذا كانت البنت خوافة وتنافض لا تفشلنا وتشيل شي عشان ما تكبه على ولد الاجواد (a16) ) طبعاَ هذا

بوجود أبوها وألا أخوها تجلس خمس دقايق عشر دقايق على حسب وبعدها عاد إذا شافو بعض وصار كل شي تمام

حددو وقت الملكة وطبعاَ تكون الملكة قبل بكم شهر والبعض يحط ملكه وشبكه كبيرة اكبر من العرس وطبعاَ كل هذي من

العادات الدخيلة علينا وكل هذا بذخ وإسراف ماله داعي .

عاد في فترة الملكة اللي هي هالكم شهر عند بعض الناس يجي المعرس يتقهوى عند العروس في بيتهم ويشوفها

ويسولف هو وياها عاد بعضهم يصير دبلة ستبد ما صدق انه يتملك كل أسبوع مرتز عندها والبعض الأخر يطلعون مع بعض

وهذا من رايي الشخصي ما أأيده ابد(r70yty) ( كفاية عليه قهوتن في المجلس وتخب بعد والطلعات يورينا شطارته عقب العرس (qq72) )

المهم عقب الخطبة والملكة والشبكة يجي العرس وخسايره إذا كان كبير الله يعين المعرس على الخساير والمصاريف

والعروس على الدوخة من اختيار زفات وكوشة ... الخ ) عاد يوم العرس نفسه بصراحة أنا مقهورة من عاداتنا الحين

بصراحة يا أخوان ويا أخوات تروح لليله العرس والعرسان ما تهنو في بعض المعازيم ما يجون إلا بعد 10 وعلى بال ما

يجتمعون وتنزف العروس إلى الساعة 3 الفجر بالله وين لليله هالعمر اللي يقولون عنها راح الليل والعروس تنزف

والمعرس يستناها في الغرفة <<<< عاد مسكين عرس الرجال ينتهي بدري

طبعاَ هالكلام اللي قلته ما ينطبق على الكل وكذالك ما تطرقتنا الكل شي بالتفصيل لأن هالموضوع متشعب ولو نتكلم

فيه راح يأخذ منا أيام واحنا ناقش هالعادات الدخيلة علينا , وما نستغني عن مداخلاتكم والتعليق على الموضوع وإذا هو

عاجبكم قولو لي استمر في الموضوع عشان نبحث ونكتابة الجزء الثاني وإذا ما اعجبكم قولو لي ما اعجبنا عشان

نتوقف عن طرح الموضوع ولا تجاملون ترى الحق ما ينزعل منه <<<< اخس يالروح الرياضيه (vv) هههههه [/SIZE]

حقوق الطبع محفوظه ..(a21)

تم إعداد وتنفيذ الموضوع من قبل .. النجديه

والمصدر والمرجع .. أمها (ern)