28-02-18, 01:25 PM
|
|
|
قصه طريفه بين شاعرين
قصتنا تتحدث عن شاعرين كبار ومن أعلام الشعر بالستينات والسبعينات
بين الشاعر الكبير مبارك الطومي والشاعر الكبير جزاء الحربي .وهم أصدقاء وخويا وخوتهم حلوه وفيها بعض المواقف الطريفه دايم تحصل بينهم
المهم في أحدى السنين وكا في فصل الربيع وهم مربعين ببيوت شعر في بر الكويت وطرى على بال مبارك الطومي يسير يتقهوى عند جزاء الحربي وقت الضحويه . ويوم وصل عند خويه ما حصل القهوه زاهبه ولا فيه أستعداد جيد من خويه وأستغرب . المهم قعد عنده مده بسيطه ولا جاب له طاري وسلم عليه مشى و بعد يومين أرسل له هذه القصيده .
جاك المسْيّر ما لقى منك ترحيب
لا جبت له قهوه ولا من قدوعي
ياليتني دورت غيرك معازيب
جيتك بجوع ورحت منك بجوعي
الظاهر أنك ما تعرف المواجيب
وأكيد طبعك يختلف عن طبوعي
حنا لا جانا الظيف ننثر له الجيب
ونجيب له من كل شكلٍ ونوعي
قلته وأنا رزقي على عالم الغيب
هذا وأنا أبخل واحدٍ في ربوعي
يوم قراها جزاء الحربي ركب وانيته وراح له وأعتذر منه وعزمه وقال
بكره قهوتك عندي
وكتب له رداً على قصيدته
أقدع عسى يقدع على راسك الذيب
في خايعٍ مابه من الناس روعي
ذيبٍ شجاع ولا سنونه بتركيب
ذيبٍ ولد ذيبٍ وشرسٍ بتوعي
وسوى بك سواتٍ يطلع لها الشيب
ويجزع لها قلب الشجاع البتوعي
متعطلٍ بالبر شرقي تناجيب
من ليلة الجمعه ليوم الربوعي
مرحوم يا عودٍ كسى راسه الشيب
وهنديته تذرف عليه الدموعي
وسلامتكم
وأعذروني أن كان فيها قصور
وهذا حسب ما سمعتها والله أعلم
|