إذا السهر تعبْك واحتجتي النوم،،
تخيلي نفسك بحضني ونامي
لا ملحقك شرهه ولا ملحقك لوم،،
لو كان جرحي من سبايبك / دامي
تلّحفي صدري وانا لوّ أبا اقوم ،،
مانيب قايم لو تكسّر عظامي
سامي ولو آعيش فالحب محروم،،
بأموت سامي منه [ وأعيش سامي ]
حتى ولو إني معذَب ومظلوم ،،
أبكي من الداخل [ واسوي عصامي ]
وإن صبّت عيوني على خدي غيوم ،،
عضيت من غصّة غيابك بهامي
وإذا سألتي / كم لعينك عن النوم ..؟،،
بأقولك مالك ومالي / ونامي
قدلي ثلاثه شهور إلا كذا يوم ،،
ارقد / قبل ساعة فقط من دوامي
وأفز فزة من على الوجه ملطوم ،،
وأدوّر اسمك في روشتة لاسامي
وأدق لين اسمك يجي صادر اليوم ،،
وأقفّلْه واتخيل أنك [ أمامي ]
قلتي يا ناصر / قلت لبيه ريوم ،،
قلتي حرامي قلت منهو [ حرامي..؟ ]
قلتي سرق قلبي وخلاني اشوم ،،
عن كل خلق الله وخرّب نظامي
ثم راح وعيون السهر تلعن النوم ،،
وأن قلت له وش فيك يقول [ نامي ]