للاسف كنت اتعجب كيف يغتنون هالعمالة وكيف يحولون هالالوف المؤلفة لديارهم ؟؟
واكتشفت السبب وانه بسبب دلاخة بعضنا وانا اولهم للاسف ..
موقفين بسيطين ينبئون عن الواقع ..
المدام قالت لي قبل كم يوم اشتر فنايل وسراويل ترى ما عندك !!
قلت وين راحوا تو شاري 4 من كل نوع !!
قامت تناظر فيني وكنها تقول اييييييييييييييييييه كليتهم !!
المهم توكلت ومريت حراج بن قاسم "" كنت اظنه ارخص سوق "" وشريت درزن من كل نوع .. سراويل .. وقصير .. وفنايل ..
بكم يالحبيب ؟؟
قال السراويل بمية وغشرة والقصير بثمانين والفنايل بتسعين ..
المجموع 280 ريال ؟؟
منا منا قال مكسبي فيها بسيط ..
عطيته 280 وتوكلت على الله !!
ويوم الخميس الماضي كنت معزوم عند واحد قال ابوديك مطعم شعبي على كيف كيفك بس تعال لي المحل ونطلع سوى ..
المهم وانا رايح له مريت المعيقلية قلت اوقف وادور شي يبونه الاهل ..
مريت محل عنده نفس البضاعة اللي شريتها من الحراج ..
لقافة وحب نكد على نفسي سالت العامل بكم لو اخد درزن من كذا وكذا وكذا ..
حسبها العامل .. تدرون بكم طلعت ..
230 ريال ..
الفرق 50 ريال يا ناس !!
لكن وش نقول !!
==
موقف ثاني واحد من الاخوان راح يغير زيت لسيارته وقف عالحفرة وقال للمعلم بكم ؟؟
قال سيارتك تحتاج 6 علب بـ 115 ريال ومعها نغير السيفون !!
قال بمية ينفع "" مسوي ذكي ؟؟ ""
قال العامل بمية وعشرة عشانك ..
قال طيب ..
والعامل يشتغل قال فلتر الهواء يباله تغيير ترى يضر سيارتك ثال اخونا غيره ؟؟
خلص العامل قال 180 ريال ..
كيف ؟؟
الفلتر بخمسين لعيونك ..
منا منا ..
المهم عطاه 150 بالمطاق والعامل يقول خسرتنا 30 ريال .
يقول خويي رحت لورشة ثانية حسبها قال بنسويها لك بـ 145 ريال ..
التعليق لكم ..