06-04-21, 04:21 AM
|
|
رد: سجل أحب مالديك من إنتاجك ولاتتردد
ياقلب عيد وافرح اليا ثار بركان الغضب
واضحك بوجه ابن الردي لاثار حقده واقهره
معذور لاشافك حقود لازم يضيق ويكتئب
انت الوحيد اللي توطا شاربه وتمسخره
لأنك اديب وشاعر ان واجهت لك قليل أدب
يبقى الشعر غاياتك اليا من نويت تجرجره
ياقلبي أثرك يامخيف سويت بالشعر العجب
حولت بستان المزارع هالسخيف لمقبره
لاصاروا أعــدائك حطب تربع وشب الحطب
وان صارت الدنيا شتا قل ارحبي يالزمهره
سيف العواذل من خشب وسكوتك انت من الذهب
في ظل صمتك يعتلي نحيب صوت وزمجره
لاتحبطك نقدة لئيم الطبع واجعلها سبب
لا ازداد لؤمه زدت حلم وزدت طيب ومقدره
تبي تعرف انك نجحت ..؟ انظر وراقب عن كثب
لد لمحيطك لحظه وشف كم حواليك احجره
فاقطف من المعنى الفريد احلا عناقيد العنب
هالناس ماترمي سوى (اشجار مثلك مثمره)
ياقلب اذا نظم القصيد سموه اناشيد ولعب
فاللي يسمونه قصيد اسمه خرافه ثرثره
( غلطتك انك في وسط مستعربين من العرب )
اللي يحسبون الشعر طبله وزير وزمره
مجبور انا ادريبك تبي تهنا بشوفة من تحب
الله يعينك عالغثا ويقبل عزاك ويجبره
لكن تصبر دامك بقرب الحبيبه واحتسب
اجرك على ربك ولقنهم دروس البعثره
اجمع لهم في داخلك قسوة تـفـاكـــير العتب
واليا جمعت اجزل معاني الشعر فيهم انثره
قل للذي اساء لي لو لا الغبينه ما إنتحب
هرج القفا تراه لأشباه الرجال وللمــره
وقل للكلاب اللي تنابح ماتضرين السحب
انا اعتلي هام السما وهم خلف سور المجزره
الذيب سرحان بزمانً فات لا منه قنب
تجفل له قلوب الغنم وكل راعي يحذره
وهالوقت لا والله ما اسمه ذيب يخسى ويعقب
حرام اسم الذيب يعطى ذيــــــخ محدن عبره
محشوم مرقاب الجبل مرقابه براس الكنب
ياكل من العشب الخضر ويمشي بمشية مخطره
اقفا زمان اهل الكرم أهل الدلال أهل الرطب
اللي بهم قلب الرفيق لضيق وقتك تذخره
ماعاد به غير الرخوم اللي تحوم بلا سبب
دٌنِّــسْـتْ ياجـوّ الصقور ابحومة المستصقره !
ماباقي الا من رحمه الله ياوقت التعب
ناس حماها الله من رجال الحكي والمظهره
فيهم فقير المال لاجا الضيف واجبه انكتب
يمد فنجال الوفا وصفر الدلال مبهره
وفيهم عزيز الجاه لامن جاه محتاج وطلب
ماخيب ظنونه يطيب خاطره ويقدره
مابه ردي ياصل لدرب المرجله لأنه صعب
ياقلب واصل في في المسيره والدروب ميسره
من شب ناره من جمر فأنا سعيري من شهب
ومن لا تعذر عن خطاه لاتلمس له معذره
ومن لا يفرق بين راسك يالذبيحه والذنب
أنشهد انه مابه من المرجله ثقل اشعره
ف ياقلب معذور الحقود ان ثارت انفاسه غضب
اضحك بوجه ابن الردي لاثار حقده واقهره
~.. تفاكير ..~
|